ძალოსანი შოთა მიშველიძე სამ ვერცხლის მედალს დაეუფლა მსოფლიოს ჩემპიონატზე
ტაშკენტში მიმდინარე შეჯიბრებაზე, დღეს მსოფლიოს ჩემპიონ-პრიზიორები 61 კილოგრამ წონით კატეგორიაში მოასპარეზე მამაკაცთა შორის გამოვლინდნენ. კონკურენციაში ორი ქართველი ძალოსანიც ჩაება და ერთ-ერთმა უმაღლესი ტიტულისთვის ბოლო მომენტამდე იბრძოლა - შოთა მიშველიძე კვარცხლბეკზე სამჯერ ავიდა. სამივეჯერ მეორე საფეხურზე.
მიშველიძემ ორჭიდში 286 კილოგრამი მოაგროვა და ჩამორჩა მხოლოდ სამხრეთკორეელ როკ შინს, რომელმაც ცალკეული მოძრაობების ჯამში 288 კილოგრამი ასწია. სწორედ შინთან წააგო ქართველმა მსუბუქწონოსანმა მცირე ოქროს მედლისთვის ბრძოლა - ატაცშიც და აკვრაშიც, თითო კილოგრამით.
61 კილოგრამ წონით კატეგორიაში, ფიცარნაგზე რამინ შამილიშვილიც გავიდა და 267 (122+145) კილოგრამით მეშვიდე ადგილი დაიკავა.
მსოფლიოს ჩემპიონატი უზბეკეთის დედაქალაქში 17 დეკემბრის ჩათვლით გაგრძელდება და შტანგას კიდევ რვა ქართველი ძალოსანი ასწევს. მათ შორის, ოლიმპიური თამაშების ორგზის, მსოფლიოს ოთხგზის და ევროპის ხუთგზის ჩემპიონი ლაშა ტალახაძე, რომელიც მსოფლიოს მეხუთე ოქროს ჩემპიონატის ბოლო დღეს შეუტევს.