ილია II მადლობას უხდის რუსეთის პატრიარქს მისი პოზიციისთვის აფხაზეთის და ცხინვალის რეგიონის მიმართ
"მინდა კიდევ ერთხელ გადაგიხადოთ მადლობა თქვენ და რუსეთის მართლმადიდებელ ეკლესიას იმის გამო, რომ პოლიტიკური ინტერესების მიუხედავად, საეკლესიო კანონების გათვალისწინებით, თქვენ აღიარებთ აფხაზეთს და სამხრეთ ოსეთს, საქართველოს ტერიტორიებს, როგორც საქართველოს და ქართული ეკლესიის განუყოფელ ნაწილად.
ჩვენ და ჩვენი ხალხი თქვენი მადლიერები ვართ იმის გამოც, რომ თქვენ მონაწილეობთ ჩვენი ტყვედ ჩავარდნილი მოქალაქეების გათავისუფლების პროცესშიც. რასაკვირველია, კვლავ არსებობს პრობლემები და გადაუჭრელი საკითხები, მაგრამ არსებობს უკეთესი მომავლის იმედიც. ჩვენი კეთილგანწყობა თქვენდამი გულწრფელია", - ნათქვამია საქართველოს პატრიარქის მიერ გაგზავნილ წერილში.
საქართველოს მართლმადიდებელი ეკლესია აფხაზეთს თავის კანონიკურ ტერიტორიად მიიჩნევს, ასე თვლის მსოფლიოს ყველა მართლმადიდებელი ეკლესია, მათ შორის, მოსკოვის საპატრიარქო.
ოკუპირებული აფხაზეთის დე ფაქტო რესპუბლიკაში რეგისტრირებულია ორი აუღიარებელი ეპარქია: "აფხაზეთის მართლმადიდებელი ეკლესია" [რომლის წარმომადგენლებიც თავს საქართველოს ეკლესიის ნაწილად არ მიიჩნევენ და პატრიარქად რუსეთის პატრიარქს თვლიან] და აფხაზეთის წმინდა მიტროპოლია, რომლის ცენტრიც ახალ ათონშია.
აფხაზეთის ორ მართლმადიდებელ თემს შორის დროდადრო დაძაბულობაც იჩენს თავს, უმთავრესად „აფხაზეთის მართლმადიდებელი ეკლესიის“ მოთხოვნის გამო, „აფხაზეთის წმინდა მიტროპოლიის“ წარმომადგენლებმა გაათავისუფლონ ახალი ათონის მონასტერი და მათ გადასცენ.