ოდესაში უკრაინის ფლოტისთვის განკუთვნილი ორი ამერიკული სამხედრო კატარღის ჩატანას ელოდებიან
სატვირთო გემი 8 ნოემბერს გამოვიდა ბალტიმორიდან, სადაც უკრაინელმა მეზღვაურებმა უკვე გაიარეს მომზადება აშშ-ის მიერ მათთვის სპეციალურად შემუშავებული „გაფართოებული პროგრამის“ ფარგლებში. ვაშინგტონისგან შეძენილი ორი ახალი კატარღა უკრაინის სამხედრო-საზღვაო ძალების გასაძლიერებლად არის განკუთვნილი.
ორი კატარღა ეს არის უკრაინის უსაფრთხოებისთვის განკუთვნილი იმ ამერიკული პაკეტის ნაწილი, რომლის საერთო ღირებულება 2,5 მილიარდ ამერიკულ დოლარს შეადგენს.
ამასთანავე მიმდინარე წლის ზაფხულში აშშ-ის სახელმწიფო დეპარტამენტმა უკრაინისათვის 600 მილიონი ამერიკული დოლარის ღირებულების 16 ერთეული Mark VI საპატრულო კატარღისა და შესაბამის აღჭურვილობის მიყიდვას დაუჭირა მხარი.
უკრაინამ, რომელიც ნატოში გაწევრიანებას ესწრაფვის, დიდძალი ამერიკული წარმოების საბრძოლო მასალა და რამდენიმე ათეული რაკეტსაწინააღმდეგო სისტემა „ჯაველინი“ მიიღო, რამაც კრემლის უკიდურესად ნეგატიური რეაქცია გამოიწვია.
უკრაინა რუსეთს ადანაშაულებს აღმოსავლეთ უკრაინაში მოქმედი დონბასელი სეპარატისტების შეიარაღებასა და ფინანსურ დახმარებაში.
2014 წლის გაზაფხულზე რუსეთმა ყირიმის ნახევარკუნძულის ანექსია და უკანონო რეფერენდუმის გზით მისი მიერთება მოახდინა.