აზერბაიჯანმა სომხეთს გადასცა 16 ნოემბერს დაღუპული სამი ჯარისკაცის ცხედარი
სომხეთის თავდაცვის სამინისტრო დაღუპულთა ვინაობას მოგვიანებით გაასაჯაროებს.
სომხეთი აცხადებს, რომ მისი ექვსი ჯარისკაცი დაიღუპა აზერბაიჯანის საზღვარზე გასული კვირის ბოლოდან განახლებულ შეიარაღებულ შეტაკებაში, რომელიც ყველაზე უფრო მასშტაბური ესკალაციაა ერთი წლის წინ, სადავო მთიანი ყარაბაღის გარშემო, ორ მეზობელ ქვეყანას შორის 44-დღიანი ომის შემდეგ.
თავის მხრივ, აზერბაიჯანის სამხედრო უწყების ცნობით, 16 ნოემბერს საბრძოლო მოქმედებების შედეგად დაიღუპა 7 და დაიჭრა 10 აზერბაიჯანელი ჯარისკაცი.
16 ნოემბრის შეტაკების შემდეგ ერევანი და ბაქო მორიგ ჯერზე შეთანხმდნენ, რომ შეწყვეტენ საბრძოლო მოქმედებებს თავიანთ საზღვარზე. სომხეთის პრემიერ-მინისტრმა ნიკოლ ფაშინიანმა 18 ნოემბერს განაცხადა, რომ ერევნისათვის მისაღებია საზღვრის დელიმიტაცია-დემარკაციის პროცესის „მოსამზადებელი ეტაპის“ შესახებ მოსკოვის მიერ შეთავაზებული წინადადებები.