სამოქალაქო აქტივისტებმა გორში აქცია გამართეს
პოლიციელებმა სამოქალაქო აქტივისტები ფიზიკური ძალის გამოყენებით, სუს-ის ოფისის მიმდებარე ტერიტორიიდან გაიყვანეს. აქციის მონაწილე ლაშა ჯიოშვილი აცხადებს, რომ პოლიციელები ერთი პარტიის შეკვეთას ასრულებენ, ძალის გამოყენებით ცდილობენ აქტივისტების პროტესტის ჩახშობას, თუმცა მათ ეს არ გამოუვათ, რადგან მსგავსი პროტესტი მალე მთელ საქართველოს მოიცავს.
დღეს დილით „გირჩი - მეტი თავისუფლებისთვის“ ორი წარმომადგენელი გორის პოლიციასთან სამართალდამცავებმა დააკავეს. მათ ავტომანქანა პოლიციის შესასვლელთან დააყენეს და გზა ჩაკეტეს. ბადრი გრიგალაშვილი და ზურაბ ხომერიკი წინასწარი დაკავების იზოლატორში გადაიყვანეს.
12 ნოემბერს დილით, პარტია „გირჩი - მეტი თავისუფლების" წარმომადგენლებმა ექვს ქალაქში ჩახერგეს სახელმწიფო უსაფრთხოების სამსახურის შენობების ეზოებში შესასვლელები. ექვს ქალაქში ერთდროულად მიმდინარე აქციაზე სამართალდამცავებმა სულ 10 ადამიანი დააკავეს. მათგან არცერთი არ არის თბილისის აქციიდან. ზურა გირჩი ჯაფარიძეს, რომელიც თბილისის აქციის მონაწილეა, სამართალდამცავებმა 200-ლარიანი საჯარიმო ქვითარი გამოუწერეს. სამართალდამცავებს მისი დაკავება არ შეეძლოთ, რადგან მას პარლამენტის დეპუტატის იმუნიტეტი იცავს.