ლიეტუვაში რუსეთის სასარგებლოდ ჯაშუშობაში დამნაშავედ ცნეს ამ ქვეყნის ორი მოქალაქე

ლიეტუვაში, კლაიპედის სასამართლომ, რუსეთის სასარგებლოდ ჯაშუშობაში დამნაშავედ ცნო და ოთხი წლით პატიმრობა მიუსაჯა ბალტიის ახალგაზრდული ასოციაციის, „იუვენიუსის,“ დირექტორ ალექსეი გრეიჩუსს, იტყობინება ლიეტუვის სახელმწიფო მედია.


სასამართლოს განაჩენის თანახმად, ის რუსეთის უშიშროების სამსახურმა გადაიბირა და თითქმის ოთხი წლის განმავლობაში რუსეთის დაზვერვის თანხებით აწყობდა ღონისძიებებს და მიწვეული სტუმრების მონაცემებს აგროვებდა.


გრეიჩუსი გამომცემელია, მემარცხენე აქტივისტი, კლაიპედაში „უკვდავი ასეულის“ ორგანიზატორი, დაკავებულია საბჭოთა სამხედრო მემორიალების დაცვით.

ის არის შვილიშვილი იონას და მარიონ გრეიჩუსებისა, რომლებსაც ისრაელის „იად ვაშემის“ ინსტიტუტმა მიანიჭა მსოფლიოს ხალხთა „მართლის“ საგანგებო წოდება ჰოლოკოსტის დროს ებრალეთა გადარჩენისთვის. მისი მამა, მწერალი რომანტას გრეიჩუსი, ციმბირში, გადასახლებაში დაიბადა, მაგრამ პროსაბჭოთა შეხედულებებითაა ცნობილი.

თვითონ ალექსეი რუსეთში გამართულ შეხვედრებში იღებდა მონაწილეობას და ურთიერთობა ჰქონდა რუს დიპლომატებთან. მისი მომხრეები თვლიან, რომ სამართლებრივი დევნა უკავშირდება მის პოლიტიკურ პოზიციას.


მასთან ერთად ამავე საქმეში გადის ლიეტუვის კიდევ ერთი მოქალაქე, მინდაუგას ტუნიკაიტისი, რომელმაც ბრალეულობა აღიარა და ერთნახევარი წელი მიუსაჯეს.

სასამართლოს განაჩენის თანახმად, ტუნიკაიტისი და გრეიჩუსი რუსეთის უშიშრების სამსახურის ერთმა და იმავე პირმა გადაიბირა და რეგულარულად აძლევდა დავალებებს. რუსი რეზიდენტი არ დაუკავებიათ.