ბარსელონაში საქართველოსთან თანამშრომლობით დააკავეს საქართველოს 8 და რუსეთის ერთი მოქალაქე
განცხადების თანახმად, სპეცოპერაციას წინ უძღოდა ესპანეთის სამეფოს კატალონიის ავტონომიური პოლიციის ტრანსნაციონალურ დანაშაულთან ბრძოლის დანაყოფის, ესპანეთის სამოქალაქო გვარდიისა და ესპანეთის სამეფოში საქართველოს შინაგან საქმეთა სამინისტროს ცენტრალური კრიმინალური პოლიციის დეპარტამენტის პოლიციის ატაშეს თანამშრომლობა. როგორც შსს იუწყება, მათი თანამშრომლობა მოიცავდა დანაშაულის გამოვლენას, ორგანიზებული დანაშაულებრივი ჯგუფის წევრების, ასევე მათი კავშირების დადგენას და ოპერაციის დაგეგმვის მიზნით, ერთწლიან ინტენსიურ ოპერატიულ-საგამოძიებო სამუშაოებს.
ესპანელმა სამართალდამცველებმა სპეცოპერაციის შედეგად, კრიმინალური დაჯგუფების წევრები - 9 პირი - დააკავეს, მათ შორის საქართველოს 8, ერთი კი რუსეთის ფედერაციის მოქალაქე. მათ ბრალად ედებათ ესპანეთის სისხლის სამართლის კოდექსის 237-ე და 570-ე მუხლებით გათვალისწინებული დანაშაულები, რაც გულისხმობს ესპანეთის სამეფოს ტერიტორიაზე ჩადენილ ბინების ქურდობას, ასევე კრიმინალურ-დანაშაულებრივი ჯგუფის წევრობას და 5 წლამდე ვადით პატიმრობას ითვალისწინებს.
მოსამართლის განჩინების საფუძველზე გაიჩხრიკა დაკავებულების საცხოვრებელი 7 ბინა. ბრალდებულები სასამართლოს წინაშე 22 ოქტომბერს წარდგნენ.