ოკუპირებული ცხინვალის რეგიონის დელეგაცია ნიკარაგუაში არჩევნების დასაკვირვებლად მიემგზავრება
„მეგობარ ქვეყანაში კენჭისყრას დააკვირდებიან პრეზიდენტის ადმინისტრაციისა და სამხრეთ ოსეთის საკანონმდებლო ორგანოს წარმომადგენლები. ჩვენი წარმომადგენლები, სამი ადამიანისგან შემდგარი დელეგაცია, ნიკარაგუაში სამხრეთ ოსეთის ელჩის ნარიმ კოზაევის თანხლებით, ნიკარაგუის ხელისუფლების მიწვევით, დააკვირდებიან კენჭისყრის პროცესს. ჩვენ დარწმუნებულები ვართ, რომ იქ არჩევნები წარმატებული იქნება“, - განაცხადეს დე ფაქტო პრეზიდენტის ადმინისტრაციაში.
ნიკარაგუაში საპრეზიდენტო არჩევნები, რომელიც ხუთ წელიწადში ერთხელ ტარდება, 7 ნოემბერს გაიმართება. მასში ათზე მეტი პოლიტიკური პარტიის წარმომადგენელი მიიღებს მონაწილეობას.
მმართველმა პარტიამ, „სანდინისტთა ეროვნულ-განმათავისუფლებელმა ფრონტმა“ 2 აგვისტოს პრეზიდენტობის კანდიდატად დაამტკიცა ამჟამინდელი პრეზიდენტი დანიელ ორტეგა, ხოლო, მისი ცოლი როსარიო მურილიო, ვიცე-პრეზიდენტობის კანდიდატად წარადგინა.
ნიკარაგუამ ოკუპირებული ცხინვალის რეგიონის ე.წ სახელმწიფოებრივი დამოუკიდებლობა, 2008 წლის 5 სექტემბერს, რუსეთის ცნობის შემდეგ ორ კვირაში აღიარა. შემდგომ დე ფაქტო რესპუბლიკის დამოუკიდებლობა ასევე აღიარეს ვენესუელამ, ნაურუმ და სირიამ.