თურქეთის დაზვერვა: დაკავებული რუსეთის მოქალაქეები ინსტრუქციებს იღებდნენ დუმის დეპუტატ ადამ დელიმხანოვისგან
9 ოქტომბრის ოპერაციის დროს, რომელიც სტამბოლში ჩაატარეს პოლიციის ტერორიზმთან ბრძოლის განყოფილებამ და ეროვნულმა დაზვერვამ, ექვსი უცხოელი დააკავეს - ოთხი რუსეთის მოქალაქე, ერთი უკრაინისა და ერთი - უზბეკეთის. ეჭვმიტანილებს ჩამოართვეს სამი პისტოლეტი, რომელთაგან ერთს მაყუჩი და ლაზერული სამიზნე ჰქონდა. დაკავებულები სტამბოლის ციხეში მოათავსეს. მათ 20 წლამდე პატიმრობა ემუქრებათ.
MIT-ის ცნობით, ჯგუფის ლიდერი იყო ბისლან რასაევი, რომელმაც „ორი ადამიანის მოკვლის ბრძანება მიიღო“ სახელმწიფო დუმის დეპუტატისა და რამზან კადიროვის თანამებრძოლის, ადამ დელიმხანოვისგან. დაკავებულები გეგმავდნენ თურქეთში მცხოვრები ჩეჩენი ოპოზიციონერის, აბდულჰაქიმის მოკვლას, რომელიც სირიაში ბაშარ ალ-ასადის რეჟიმის წინააღმდეგ იბრძოდა, აცხადებს თურქეთის დაზვერვა.
MIT-ის თანახმად, მეორე ორგანიზატორი იყო კაზბეკ დუკუზოვი. ის ასევე მოიხსენიება ევროპაში 2004 წლიდან ოთხი ჩეჩენი ოპოზიციონერის მკვლელობასთან კავშირში.
როგორც თურქეთის დაზვერვა იტყობინება, თავდასხმის განსახორციელებლად რასაევი იარაღის ყიდვას გეგმავდა აბდულა აბდულაევისგან, რომლის მეტსახელია აბუბექირი. ჩხრეკისას მისი ბინის აბაზანაში მოწყობილ სამალავში აღმოაჩინეს ლაზერული ხელსაწყო, მაყუჩიანი იარაღი და სხვა აღჭურვილობა.
დაკავების ოპერაციის შემდეგ სტამბოლში მალე ჩავიდა რამზან კადიროვი. ვიზიტის ზუსტი თარიღი უცნობია. არსებობს რამდენიმე ვიდეო, რომლებზეც ჩანს, რომ ის თავის თანამებრძოლებთან ერთად ქუჩებში სეირნობს ღამით. არ არის ცნობილი, დაკავშირებულია თუ არა სტამბოლში მისი ვიზიტი თურქეთის უშიშროების ძალების მიერ განხორციელებულ დაკავებებთან. თუმცა ასეთ პირდაპირ კავშირში დარწმუნებულია ოპოზიციონერი ბლოგერი ხასან ხალიტოვი, რომელიც შესაძლოა ჯაშუშობაში ეჭვმიტანილთა სამიზნე ყოფილიყო.