პაატა მანჯგალაძე: მოვუწოდებ საქართველოს პრეზიდენტს, შეიწყალოს მიხეილ სააკაშვილი

„სტრატეგია აღმაშენებლის“ გენერალური მდივანი, საპარლამენტო ფრაქცია „შარლ მიშელის რეფორმების ჯგუფის“ თავმჯდომარის მოადგილე პაატა მანჯგალაძე საქართველოს პრეზიდენტს, სალომე ზურაბიშვილს პატიმრობაში მყოფი ექსპრეზიდენტის, მიხეილ სააკაშვილის შეწყალებისკენ მოუწოდებს. რადიო თავისუფლების „დღის საუბრებში“ პაატა მანჯგალაძემ თქვა, რომ ეს იქნებოდა პრობლემის მოგვარების ევროპული გზა და არსებული კრიზისიდან გამოსავალი:


„თუ ხელისუფლების შტოებს შორის არბიტრი ამ სისტემის ქვეყნებში არის პრეზიდენტი და თუ სასამართლო ვერ ასრულებს თავის ამოცანას და მიტაცებულია, მან, როგორც არბიტრმა, უნდა შეიწყალოს პრეზიდენტი“, - განაცხადა პაატა მანჯგალაძემ, რომელმაც გადაცემაში შეაფასა სალომე ზურაბიშვილის ის განცხადებაც, რომლის თანახმადაც იგი მიხეილ სააკაშვილს არასოდეს შეიწყალებს.




„ეს განცხადება მან გააკეთა, როგორც ადამიანმა და მე ვიცი, რომ მძიმე ურთიერთობა იყო სალომე ზურაბიშვილსა და სააკაშვილს შორის, მაგრამ ჩვენ ადამიანები ვართ და თუ პრეტენზია გვაქვს სახელმწიფოებრივ აზროვნებაზე, პირადი წყენები უნდა გადავდოთ ყველამ გვერდზე და საქმეს უნდა მივუდგეთ სახელმწიფოებრივად. ის კი არა, რა სჭირდება რომელიმე პარტიას ან რომელიმე ადამიანს, თუნდაც თავისი თავმოყვარეობისთვის, არამედ რა სჭირდება ხალხს და საქართველოს სჭირდება მშვიდობიანი განვითარება. ამ გზას ვთავაზობ საქართველოს პრეზიდენტს“, - აღნიშნა პაატა მანჯგალაძემ „დღის საუბრებში“. გადაცემაში მან ხაზი გაუსვა სამართლიანი სასამართლოსა და პოლიტიკური მართლმსაჯულების პრობლემას და ამ კონტექსტში მიხეილ სააკაშვილის მიმართ გამოტანილ განაჩენებს:




„სააკაშვილში ხედავდნენ ოპონენტს და კონკურენტს უსწორდებიან სასამართლო მექანიზმებით. ეს არის პრობლემა, თან ირიბი მტკიცებულებებით შეკერილი საქმეა... ადვოკატები მოითხოვენ გასაჯაროვდეს მის მიმართ წაყენებული ბრალდებები, რომ საზოგადოებამ იცოდეს, რაში არის ეს ადამიანი მხილებული... ჩვენ რეალური სამართლიანი სასამართლოს პირობებში, ყოველგვარი პოლიტიკური მოტივისგან დაცლილი სასამართლოს პირობებში უნდა გავიგოთ, რა მოხდა“, - აღნიშნა პაატა მანჯგალაძემ, რომელმაც „დღის საუბრებში“არ გამორიცხა ისიც, რომ მიხეილ სააკაშვილის საკითხი სამოქალაქო დაპირისპირების საგანი გახდეს.


„მიხეილ სააკაშვილთან დაკავშირებით მე ვხედავ სამოქალაქო დაპირისპირების რისკს. მე ვარ ამ ქვეყნის მოქალაქე, ვიცნობ ძალიან კარგად ჩემს ერს, ჩემს ხალხს, ვიცნობ საქართველოს ისტორიას, ვიცი უახლოესი ისტორიაც. უსამართლობა აღქმაა, მაგრამ აჩვენა აქციამ, რომ ძალიან ბევრი ადამიანი თვლის, რომ უსამართლოა ამ შემთხვევაში სასამართლო და გამოტანილი განაჩენები მის მიმართ. თუ ნახავენ, რომ ღმერთმა ნუ ქნას და შედეგი არის ძალიან მძიმე, ამას მოჰყვება სამოქალაქო მღელვარება, მე ამაში ზუსტად ვარ დარწმუნებული და ეს არ უნდა დაუშვას, ეს ღლიცინი, ეს სისულელე, ვითომ არაფერი არ ხდება, ვითომ ყველაფერი მოგვარებული აქვთ და ყველაფერი რიგზე აქვთ. სინამდვილეში სერიოზული პრობლემა აქვს ეხლა სააკაშვილის პატიმრობით „ქართულ ოცნებას“ და ამას უნდა გაართვას თავი ღირსეულად“, - განაცხადა პაატა მანჯგალაძემ „დღის საუბრებში“.


საქართველოს მესამე პრეზიდენტი მიხეილ სააკაშვილი რუსთავის #12 პენიტენციურ დაწესებულებაში დაკავების დღიდან, 1 ოქტომბრიდან შიმშილობს.




მიხეილ სააკაშვილი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება.




ამჟამად, სასამართლო განიხილავს მიხეილ სააკაშვილის წინააღმდეგ წარმოებულ ორ საქმეს. ერთი საქმე ეხება 2007 წლის 7 ნოემბერს, მომიტინგეთა მასობრივად დარბევას, ტელეკომპანია „იმედში“ შეჭრას და არკადი პატარკაციშვილის კუთვნილი ქონების დანაშაულებრივად ხელში ჩაგდებას. რაც შეეხება მეორე საქმეს, ის უკავშირდება სახელმწიფოს კუთვნილი 8 837 461 ლარის გაფლანგვის ფაქტს, ე.წ. პიჯაკების საქმეს. „7 ნოემბრის საქმის“ სასამართლო პროცესი ბრალდების მხარის მტკიცებულებების გამოკვლევის ეტაპზეა. ე.წ. პიჯაკების საქმეზე კი სასამართლო დაცვის მხარის მტკიცებულებებს იკვლევს. მიხეილ სააკაშვილი ბრალდებულია ასევე საქართველოს სახელმწიფო საზღვრის უკანონოდ გადმოკვეთაში.