პარლამენტარებმა ბრიტანეთში პანდემიის დასაწყისში მთავრობის მოქმედებებს სერიოზული ჩავარდნა უწოდეს
სპეციალური ანგარიშის ავტორები არიან პარლამენტის ჯანდაცვისა და სოციალური დაცვის კომიტეტის და მეცნიერებისა და ტექნოლოგიების კომიტეტის წევრები. ანგარიშს ეწოდება „კორონავირუსი: ნასწავლი გაკვეთილები“.
ორივე კომიტეტის მუშაობაში მონაწილეობენ პარლამენტის ყველა პარტიის წარმომადგენლები. როგორც BBC იტყობინება, 150-გვერდიან დოკუმენტში მოცემულია ხელისუფლების მოქმედებების შეფასება და გაანალიზებულია დასავლეთ ევროპაში COVID-19-ის სიკვდილიანობის ყველაზე მაღალი მაჩვენებელი - 150 ათასი ადამიანი.
ორივე კომიტეტების ხელმძღვანელმა, კონსერვატორმა ჯერემი ჰანტმა მცდარი უწოდა ბრიტანეთის მთავრობის სტრატეგიას, რომელიც ე.წ. ჯოგური იმუნიტეტის გამომუშავებას ისახავდა მიზნად. ქვეყანაში პირველი „ლოკდაუნი“ ბევრად უფრო გვიან შემოიღეს, ვიდრე ამას ვითარება მოითხოვდა. ამან გაუმართლებელი მსხვერპლი გამოიწვია.
დიდ ბრიტანეთში კორონავირუსით დაავადების პირველი შემთხვევები 2020 წლის 31 იანვარს დაფიქსირდა, ქვეყნის მასშტაბით პირველი „ლოკდაუნი“ კი გამოაცხადეს 23 მარტს, როცა ბევრ ქვეყანაში უკვე მოქმედებდა საკარანტინო რეჟიმი.
ანგარიშში აღნიშნულია პანდემიასთან ბრძოლის დადებითი ზომებიც. კერძოდ, საყოველთაო ვაქცინაციის პროგრამა სწრაფად და წარმატებით განხორციელდა.