დე ფაქტო „კა-გე-ბე" ე.წ საზღვრის დამრღვევთა 9 თვის სტატისტიკას აქვეყნებს
მიმდინარე წლის 9 თვის განმავლობაში საოკუპაციო ძალების წარმომადგენლებმა ე.წ საზღვრის და სასაზღვრო რეჟიმის დარღვევის ბრალდებით 296 პირი დააკავეს. (2020 წლის 9 თვეში 360 იყო) - ამ ინფორმაციას დე ფაქტო უშიშროების კომიტეტი აქვეყნებს.
„კა-გე-ბე"-ს პრესსამსახურის მონაცემებით, მათგან 115 (2020 წელს 157) სახელმწიფო საზღვრის დამრღვევია, 181 კი (2020 წელს 203) სასაზღვრო რეჟიმის დამრღვევია.
„სახელმწიფო საზღვარზე არსებული ადმინისტრაციული და სამართლებრივი რეჟიმების დამრღვევთა მიმართ განხორციელდა სამართლებრივი საპროცესო მოქმედებები, რომლის შედეგად 181 ადამიანი დაექვემდებარა ადმინისტრაციული ჯარიმა, 34 ადამიანი კი რესპუბლიკის საზღვრებს გარეთ გააძევეს, საჯარიმო სანქციის გარეშე. სისხლის სამართლის საქმეები აღძრულია 15 პირის მიმართ, 58 ადამიანი გაფრთხილებულია, 7 მიმართ გამოძიება მიმდინარეობს”, - აღნიშნულია „კა-გე-ბე"-ს მიერ გავრცელებულ ინფორმაციაში.
დე ფაქტო სამხრეთ ოსეთის უშიშროების სამსახურის ე.წ საზღვრის დაცვის დეპარტამენტი შეახსენებს მოქალაქეებს, ორგანიზაციებსა და სახელმწიფო საწარმოებს, რომ რესპუბლიკის სასაზღვრო ზონაში მდებარე რაიონებში სეზონური სასოფლო-სამეურნეო სამუშაოების განსახორციელებლად აუცილებელია დოკუმენტების წინასწარ წარდგენა შესაბამისი ნებართვების მისაღებად.
დე ფაქტო „კა-გე-ბე"-ს მიერ გამოქვეყნებული სტატისტიკის მიხედვით ცხადი ხდება, რომ დაკავებული დაახლოებით 300 პირიდან მხოლოდ 10 პროცენტია საქართველოს მოქალაქე. ამ საერთო სტატისტიკის მიხედვით, დე ფაქტო რესპუბლიკიდან გაძევებულები არიან საქართველოს ის მოქალაქეები, რომლებსაც ე.წ საზღვრის დარღვევას ედავებოდნენ, ასეთი კი 34 ადამიანია. დანარჩენი 200-ზე მეტი მოქალაქე კი ოკუპირებული რეგიონის მცხოვრებლები არიან, რომლებიც ან უსაბუთოდ იმყოფებოდნენ ე.წ სასაზღვრო ზონაში, ან საქართველოს ხელისუფლების მიერ კონტროლირებულ ტერიტორიაზე გადმოსვლას ცდილობდნენ, რა დროსაც ისინი დააკავეს.