ცესკო: ამომრჩეველთა აქტივობა 17 საათისთვის 41,35%-ია
საქართველოს ცენტრალური საარჩევნო კომისიის მონაცემებით, 17 საათის მდგომარეობით, ამომრჩეველთა აქტივობა 41,35%-ს შეადგენს. ანუ ამ დროისათვის თავისი არჩევანი ქვეყნის მასშტაბით 1 446 218-მა ამომრჩეველმა გააკეთა.
შედარებისთვის, 2017 წლის თვითმმართველობის არჩევნებზე 17 საათისთვის ამომრჩეველთა აქტივობა 36,71% იყო, ხოლო 2020 წლის საპარლამენტო არჩევნებზე - 45,77%.
ამომრჩეველთა აქტივობის მიხედვით, 2 ოქტომბრის თვითმმართველობის არჩევნებზე 17 საათისთვის ყველაზე მაღალი აქტივობა რაჭა-ლეჩხუმში დაფიქსირდა. აქტივობამ აქ 17 საათისთვის 55,3% შეადგინა. ამომრჩეველთა ყველაზე დაბალი აქტივობა 17 საათისთვის ქვემო ქართლში გამოვლინდა. აქტივობა აქ 37,9% იყო.
2 ოქტომბერს საქართველოში ადგილობრივი თვითმმართველობის არჩევნები ტარდება.
ხმის უფლების მქონე მოქალაქეები ირჩევენ 64 მუნიციპალიტეტის მერებს და საკრებულოების წევრებს. პროპორციული და მაჟორიტარული წესით აირჩევა საკრებულოების სულ 2068 წევრი. 2 ოქტომბრის არჩევნებში 43 პარტია მონაწილეობს.
მერის არჩევნების პირველივე ტურში გასამარჯვებლად კანდიდატმა ხმების 50%-ზე მეტი უნდა მიიღოს. 40%-იანი ბარიერი მოქმედებს საკრებულოების მაჟორიტარი წევრების ასარჩევად.
პროპორციული სისტემით საკრებულოს წევრების ასარჩევად ყველა მუნიციპალიტეტში, გარდა თბილისისა, ბარიერი 3%-ია. თბილისის საკრებულოში მოსახვედრად პარტიებმა უნდა მიიღონ ხმების არანაკლებ 2.5%.
ამომრჩეველთა საერთო რაოდენობაა 3 497 345. საქართველოში 3 664 საარჩევნო უბანია.
2 ოქტომბრის თვითმმართველობის არჩევნებს, ევროპული საბჭოს პრეზიდენტის ინიციატივით, „ქართულ ოცნებასთან“ აპრილში ხელმოწერილი შეთანხმების დათქმის საფუძველზე რეფერენდუმად მიიჩნევს ოპოზიციური პარტიების უმეტესობა. „შარლ მიშელის დოკუმენტის“ ამ დათქმით, თუ ადგილობრივ არჩევნებში „ქართული ოცნება“ ხმების 43%-ზე ნაკლებს მიიღებს, მომავალ წელს რიგგარეშე საპარლამენტო არჩევნები უნდა ჩატარდეს. ივლისის ბოლოს, მმართველმა პარტიამ „მიშელის შეთანხმება“ ანულირებულად გამოაცხადა. მას შემდეგ „ქართული ოცნების“ ლიდერები აცხადებენ, რომ საპარლამენტო არჩევნები კონსტიტუციურ ვადაში - 2024 წელს ჩატარდება.