შეწყალება და სხვა გზები სააკაშვილის დაკავების შემთხვევაში - რა არ უნდა გამოგრჩეს 30 სექტემბერს
ბოლო დღეებში პრეზიდენტმა სალომე ზურაბიშვილმა „ქართულ ოცნებას“ აშკარა პოლიტიკური უხერხულობა შეუქმნა კოალიციური მთავრობის საჭიროებასთან დაკავშირებული მოსაზრებით, რომელიც მან ფრანგულ გამოცემა "კვირის ჟურნალთან" (JDD) ინტერვიუში გაახმაურა.
„ნაციონალური მოძრაობის“ თავმჯდომარის, ნიკა მელიას მიერ გავრცელებული ინფორმაციით, მმართველი პარტია პრეზიდენტს იმდენად აღარ ენდობა, რომ მისგან ექსპრეზიდენტ მიხეილ სააკაშვილის შეწყალებასაც მოელის და თადარიგის დაჭერას ცდილობს.
მელიამ „ძალიან სარწმუნო“ უწოდა ინფორმაციას იმის შესახებ, რომ „პროკურატურაში „ტოპ“ რამდენიმე პროკურორს დაავალეს სასწრაფოდ ახალი სისხლის სამართლის საქმეების ფარგლებში ნიადაგის მომზადება“, - სწორედ იმ შემთხვევისთვის, თუკი პრეზიდენტი ზურაბიშვილი სააკაშვილს შეიწყალებს.
მიხეილ სააკაშვილის შეწყალების პერსპექტივას ვერ ხედავს „ქართული ოცნება“. როგორც პარტიის ერთ-ერთმა ლიდერმა, დეპუტატმა შალვა პაპუაშვილმა 28 სექტემბერს უთხრა ჟურნალისტებს, მმართველ გუნდში ამგვარი მოლოდინი არ არსებობს.
ის, რომ დაკავების შემთხვევაში ექსპრეზიდენტის გათავისუფლების ყველაზე სწრაფი გზა სწორედ ზურაბიშვილის შეწყალებაა, იურისტებისთვისაც ნათელია. პრეზიდენტს შეუძლია შეიწყალოს ის დაკავებულიც, ვისაც მისთვის შეწყალების მოთხოვნით არ მიუმართავს.
არსებობს კიდევ ერთი გზაც. სააკაშვილის დაკავების შემთხვევაში საქმეში შესაძლოა უკრაინა ჩაერთოს. კიევს აქვს უფლება მისი ექსტრადიცია მოითხოვოს.
თუ მართლაც დააკავეს, როგორ შეეძლება ექსპრეზიდენტს ციხის დატოვება? წაიკითხე ვრცლად ლელა კუნჭულიას სტატიაში.
ფიქრობს თუ არა ევროკავშირი საქართველოსა და აღმოსავლეთ პარტნიორობის სხვა ქვეყნებისთვის უვიზო მიმოსვლის გაუქმებაზე?
გუშინ გამოცემა euobserver-მა ევროკავშირის შიდა დოკუმენტზე დაყრდნობით გაავრცელა ინფორმაცია, რომ შესაძლოა ევროკავშირმა საქართველოს, მოლდოვისა და ბალკანეთის ქვეყნებისთვის უვიზო მიმოსვლის შეჩერების შესახებ იმსჯელოს.
გამოცემის თანახმად, ამის ინიციატორი საფრანგეთი, იტალია და გერმანია იყო. მიზეზად კი ამ ქვეყნებიდან თავშესაფრის უსაფუძვლო მოთხოვნები და არალეგალი მიგრაცია სახელდება.
მალე ამ ინფორმაციას გერმანიის პრეზიდენტი ფრანკ-ვალტერ შტაინმაიერი გამოეხმაურა და მას ცრუ ინფორმაცია უწოდა.
ევროკავშირის მხრიდან საქართველოს, მოლდოვისა და ბალკანეთის ქვეყნებისთვის უვიზო მიმოსვლის შეჩერების შესახებ მსჯელობის შესაძლო დაწყებას უარყოფს საქართველოს საგარეო საქმეთა მინისტრი დავით ზალკალიანიც. ისიც გამოქვეყნებულ ინფორმაციას ტყუილს უწოდებს.
„მე მინდა დავამშვიდო ყველა და ასევე, იმედი გავუცრუო იმ ადამიანებს, რომლებმაც ძალიან აიტაცეს ეს ამბავი. მე ვიცი, რომ დიდი აღტკინებაა ჩვენს ოპონენტებში და წარმოუდგენელია, როცა ოპონენტები ხარობენ სავარაუდოდ ქვეყნის წარუმატებლობით და მათ მინდა იმედები გავუცრუო და ვუთხრა, რომ ეს ძალიან დიდი ტყუილია. ამ სტატიაში კონკრეტულად საქართველოზე არ არის საუბარი, მოლდოვაზე და აღმოსავლეთ ბალკანეთის ქვეყნებზეა საუბარი და არათუ გაზრდილია თავშესაფრის მაძიებელთა რაოდენობა, პირიქით, საქართველოდან ევროკავშირში თავშესაფრის მაძიებელთა რაოდენობა 75%-ით არის შემცირებული. ასე რომ, ეს ძალიან დიდი ტყუილია, არაფერი არ გვემუქრება, ყველაფერი ძალიან კარგად არის", - განაცხადა ზალკალიანმა.
წაიკითხე მეტი.
ბიუჯეტის დეფიციტი ისტორიულ მაქსიმუმზეა - რას ნიშნავს ეს ჩვენთვის
ისეთი დეფიციტი საქართველოს ბიუჯეტს, როგორიც დღეს აქვს, ბოლო ათი წლის განმავლობაში არ ჰქონია. 2021 წლის პირველ 6 თვეში ბიუჯეტის შემოსავლები მილიარდი ლარით ნაკლებია ამავე პერიოდის ხარჯებთან შედარებით და საბიუჯეტო დეფიციტმა 7,6 %-ს მიაღწია.
დეფიციტის მთავარი მიზეზი პანდემიის პერიოდში გაზრდილი ხარჯები და შემცირებული შემოსავლებია, ეს იმის მიუხედავად, რომ 2021 წელს წინა წელთან შედარებით ეკონომიკამ ნელი გამოცოცხლება დაიწყო და ბიუჯეტშიც ამ წლის პირველ 6 თვეში იმაზე მეტი თანხა შევიდა, ვიდრე დაგეგმილი იყო.
ეკონომიკური თავისუფლების აქტის მიხედვით ბიუჯეტის დეფიციტი 3 %-ს არ უნდა აჭარბებდეს. 2021 წელს ეს მაჩვენებელი დაშვებულზე ორჯერ მეტია და 7 %-ს ცდება. ამავე კანონის მიხედვით, ქვეყნის საგარეო ვალი არ შეიძლება იყოს მთლიანი შიდა პროდუქტის 60 %-ზე მეტი. არადა, ბიუჯეტის დეფიციტის შევსების ყველაზე გავრცელებული გზა საგარეო ვალებია. საქართველომ პანდემიისას გაზრდილი საგარეო ვალებითაც ისტორიულ მაქსიმუმს მიაღწია და ახლა სურს მისი ოდენობა წლის ბოლომდე 54,6 %-მდე შეამციროს.
ექსპერტების აზრით, დროის მოკლე მონაკვეთში დეფიციტური ბიუჯეტი მოქალაქეების ყოველდღიურობაზე გავლენას ვერ მოახდენს, მაგრამ თუკი ქვეყანა ამ პრობლემას ვერ გადაჭრის, საერთაშორისო საფინანსო ინსტიტუტების ნდობას დაკარგავს და დეფიციტური ბიუჯეტიც გავლენას იქონიებს მოქალაქეების შემოსავალზე.
წაიკითხე მეტი ნასტასია არაბულის სტატიაში.
საქართველოს ადგილობრივ არჩევნებს ევროპარლამენტის დელეგაცია დააკვირდება
ევროკავშირის წარმომადგენლობის ცნობით, საქართველოში დანიშნულ ადგილობრივ თვითმმართველობის არჩევნებს ეუთო/ODIHR-ის საერთაშორისო სადამკვირვებლო მისიის ფარგლებში, დააკვირდება ევროპარლამენტი, ეუთო/ODIHR-თან და ევროპის საბჭოს ადგილობრივ და რეგიონულ ხელისუფალთა კონგრესთან ერთად.
ევროპარლამენტის დელეგაცია არიან ანა ფოტიგა, მარინა კალიურანდი, მარკეტა გრეგოროვა და სხვები.
წარმომადგენლობის ინფორმაციით, ევროპარლამენტარები საქართველოში ჩამოვლენ 29–30 სექტემბერს და, ოფიციალური პროგრამის ფარგლებში, შეხვდებიან ევროკავშირის ელჩს, ეუთოს წამყვან ჯგუფს, ცენტრალურ საარჩევნო კომისიას, პოლიტიკური პარტიების, წამყვანი არასამთავრობო ორგანიზაციებისა და მედიის წარმომადგენლებს.
ევროპარლამენტის დელეგაციაში შემავალ პირთა სრული სია ნახე აქ.
ილია მეორე „სუსის მასალებზე“ განცხადებას აქვეყნებს და მედიის ნაწილს ორმაგ სტანდარტში ადანაშაულებს
საქართველოს კათოლიკოს-პატრიარქი ილია მეორე „სუსის მასალების“ გავრცელებას განცხადებით ეხმაურება.
„გაურკვეველი წარმომავლობის გამოქვეყნებულ ფაილებში ტყუილ-მართლის გარჩევა შეუძლებელია; ერთი კი ცხადია: ამ მასალამ ეკლესიისადმი მტრულად განწყობილ ძალებს მისცა ცილისწამების, პატივის, ღირსებისა და რეპუტაციის შემლახველი ჭორების გავრცელების საშუალება, რაშიც სხვებთან ერთად აქტიურად არიან ჩართულნი თავისი სკანდალური ქმედებებით ცნობილი რამდენიმე სასულიერო პირი, ე.წ. თეოლოგები საინფორმაციო საშუალებები და ზოგიერთი ტელევიზია", - აცხადებს პატრიარქი.
ილია მეორის განცხადებაში ლაპარაკია მედიის ორმაგი სტანდარტის შესახებ. პატრიარქი მიუთითებს მედიის ნაწილის მხრიდან დანაშაულის ხელშეწყობაზე.
„იკვეთება აღნიშნული ტელევიზიებისა და, ზოგადად, მასმედიის ორმაგი სტანდარტიც: საზოგადოებას კარგად ახსოვს, როგორი მკვეთრად უარყოფითი რეაგირება ჰქონდათ მათ (ისევე, როგორც ყველას) არც თუ ისე დიდი ხნის წინ მასმედიის წარმომადგენლებზე და სხვა პირებთან დაკავშირებული პირადი ცხოვრების ამსახველი კადრების ეთერში გაშვებაზე. ახლა კი თვითონ არიან დანაშაულის ხელშემწყობნი, - ცილისწამების მთავარი და ყველაზე ფართომასშტაბიანი გამავრცელებელნი, მათ შორის შერჩევითობის პრინციპით.
მაგ. ადრინდელ მნიშვნელოვან მოვლენებზე რომ არაფერი ვთქვათ, მათ ეთერში არაფერი გაჟღერებულა თუნდაც იმ საუბრების შესახებ, სადაც მღვდელმთავრების დაპატიმრებასა და საპატრიარქოს შტურმით აღებაზეა საუბარი; ეს ხომ მეტად საგულისხმო ინფორმაციაა?!" - ვკითხულობთ პატრიარქის წერილში.
წაიკითხე მეტი.
ხელოვნური კუნძული - პროექტი, რომელიც ბათუმის ბუნებრივ კონფიგურაციას ცვლის
“ამბასადორი ჯგუფი” ბათუმის სანაპიროზე ხელოვნური კუნძულის კონტურებს კვეთს. მთავრობა, მიუხედავად იმისა, რომ გარემოზე ზემოქმედება შესწავლილი არ არის, პროექტს მხარს უჭერს, ბათუმელების ნაწილი კი შიშით უყურებს იდეას, რომელიც ქალაქს სამუდამოდ შეცვლის.
შპს „ქალაქს პრაქტიკულად, მიწა აღარ დარჩა. ეს კი იქნება ახალი ტერიტორია, განვითარების ახალი ზონა“, - ასე ხედავენ ბათუმის მომავალს კომპანია „ამბასადორ ბათუმი აილენდში“, რომელსაც შავ ზღვაში ხელოვნური კუნძულის შესაქმნელად გადაეცა 90 ჰექტარი ტერიტორია. ის მოიცავს ბარცხანისა და თამარის დასახლების ორკილომეტრიან სანაპირო ზოლს.
შპს „ამბასადორ ბათუმი აილენდის“ (ეს კომპანია სპეციალურად ხელოვნური კუნძულის მშენებლობისთვის შეიქმნა 2021 წლის ზაფხულში) პროექტს „ამბასადორი ჯგუფი” აფინანსებს, რომელიც საქართველოში არაერთ სასტუმროს ფლობს, მათ შორის თბილისსა და კაჭრეთში.
„ამბასადორ ბათუმი აილენდის“ ერთ-ერთმა დამფუძნებელმა ფრიდონ ქათამაძემ რადიო თავისუფლებას უთხრა, რომ ხელოვნური კუნძული ზღვაში 50-60 ჰექტარზე შეიჭრება:
„პირველი ეტაპის კვლევებით დადგინდა, რომ ეს ზღვისპირა ზონა - ბარცხანა-ბენზეს ტერიტორია - ყველაზე მდგრადია. აქ ყველაზე ნაკლებადაა აგრესიული ტალღის ზემოქმედება, წყალმარჩხშია, ნაკლებად ეროზიული და ამიტომ გადაწყდა სწორედ ამ ადგილზე ამ პროექტის განხორციელება. წინასწარი კვლევები უკვე ჩატარებულია“.
თუმცა მთავარი - გარემოზე ზემოქმედების, გეოლოგიური და ბათიმეტრიული კვლევები ჯერ არ ჩატარებულა. ფრიდონ ქათამაძე დარწმუნებულია, რომ ზღვაში ხელოვნური კუნძული 4 წელიწადში გაშენდება, 7-8 წელიწადში კი კუნძული დასახლდება - დასრულდება შენობა-ნაგებობების და ინფრასტრუქტურის მშენებლობა.
წაიკითხე მეტი ეკა ლორთქიფანიძის სტატიაში.
რა უნდა ქნა, თუკი მთელი სამყარო შენ ირგვლივ ერთ დიდ, ცარიელ ოთახად იქცა? თუკი საჭმელმა გემო დაკარგა, ადამიანები უინტერესოები გახდნენ, შენს გონებასა და სხეულს კი უზარმაზარი ქვის ფილა ადევს? რა ხდება მაშინ, როცა მძიმედ ხარ ავად, შენ კი საკუთარ თავსაც ვერ უტყდები ამაში? ჯანდაცვის მსოფლიო ორგანიზაციის 2018 წლის მონაცემების მიხედვით, იმ დროისთვის მსოფლიოში 264 მილიონი ადამიანი დეპრესიით იტანჯებოდა. ზუსტი ციფრები არ გვაქვს, თუმცა დიდი ალბათობით, პანდემიასთან ერთად ეს ციფრი მნიშვნელოვნად გაიზარდა.