2 კვირა არჩევნებამდე - რა არ უნდა გამოგრჩეს 17 სექტემბერს
წინასაარჩევნო ჭიდილი ნარკოტესტებით გრძელდება
გუშინ „ქართული ოცნების“ ლიდერმა ირაკლი კობახიძემ თქვა, რომ პარტია „საქართველოსთვის“ ლიდერმა გიორგი გახარიამ წინასაარჩევნოდ ნარკოტესტის გაკეთებაზე უარის თქმით ნარკოლოგიური პრობლემები აღიარა.
ნარკოტესტის ჩაბარების საკითხი აქტუალური მას მერე გახდა, რაც „ქართული ოცნების“ თბილისის მერობის კანდიდატმა კახა კალაძემ ტესტი ჩააბარა და კონკურენტებსაც იმავეს გაკეთებისკენ მოუწოდა.
მის ინიციატივას ენთუზიაზმით არ შეხვედრიან პოლიტიკური ოპონენტები. ბევრისთვის გაუგებარიც აღმოჩნდა.
13 სექტემბერს გიორგი გახარიამ თქვა, რომ ის ტესტს საზღვარგარეთ ჩაიტარებს, რადგან აქვს ინფორმაცია, რომ „ქართული ოცნების“ ლიდერები საქართველოში ტესტირების შემთხვევაში პროვოკაციას გეგმავდნენ მის წინააღმდეგ.
16 სექტემბერს თავად კახა კალაძეც გამოეხმაურა მის ყოფილ თანაგუნდელს და თქვა, რომ გახარიას განცხადებები ნარკოტესტირებაზე მისთვის გაუგებარი იყო.
"ისეთ სიტუაციაში აღმოვჩნდი ამ ნარკოტესტთან დაკავშირებით, უბრალოდ, გაოგნებული ვარ. ნამდვილად არ ველოდი ამ შედეგს. გულწრფელად დარწმუნებული ვიყავი, რომ ყველა კანდიდატი გამომყვებოდა ამ კამპანიაში და მაქსიმალურად ყველა ერთად შევძლებდით ჯანსაღი ცხოვრების უფრო მეტ პოპულარიზაციას. სამწუხაროდ, ძალიან არასახარბიელო შედეგი მივიღეთ, გაუგებარი განცხადებები მოვისმინეთ, ადამიანურად გული მწყდება, როდესაც გიორგი გახარიას ამ მდგომარეობაში ვხედავ“,- აღნიშნავს კალაძე.
რატომ გახდა ნარკოტესტის საკითხი აქტუალური წინასაარჩევნოდ? „სტრატეგია აღმაშენებლის ლიდერი“ გიორგი ვაშაძე ფიქრობს, რომ ეს რეალური პრობლემებიდან ყურადღების გადატანის მცდელობაა.
„ცოტა საბავშვო ბაღი მგონია ამაზე მსჯელობა და კამათი ვინ სად მიიტანს შარდს და ვინ რას გააკეთებს ამასთან დაკავშირებით, არასერიოზულია“, - თქვა ვაშაძემ.
წაიკითხე მეტი.
„ვინც მისმენს, კარგად მოისმინოს“ - გავრცელებულ ჩანაწერებში მოსაუბრეებს ეჭვი აქვთ, რომ უსმენენ
12 სექტემბერს ინკოგნიტო წყაროს მიერ გავრცელებულ ათასობით საუბრის ჩანაწერში, რომელიც წყაროს მტკიცებით სახელმწიფო უშიშროების სამსახურის საეკლესიო პირებზე მიყურადების და თვალთვალის შედეგად შექმნილი დოკუმენტებია, სულ მცირე 12 სხვადასხვა მოსაუბრე აღნიშნავს, რომ იცის, თავის სატელეფონო საუბრებს რომ უსმენენ.
შემთხვევები, როდესაც მოსაუბრეები ახსენებენ, რომ მათ უსმენენ
შენიშვნა: რედაქციის გადაწყვეტილებით, საუბრის ჩანაწერის ტექსტებიდან, რომლის ნაწილის ავთენტიკურობის მხოლოდ ირიბი მტკიცებულებები არსებობს, იმ მოსაუბრეთა სახელი და გვარი, რომლებიც არ არიან საჯარო პირები, ამოღებულია.
მ/წ 27 მაისს, მარნეული-ჰუჯაბის ეპისკოპოსმა გიორგი ჯამდელანმა, თავის მრევლის წევრთან [მინიშნებულია სახელი, გვარი და პირადი ნომერი] საუბრისას განაცხადა შემდეგი - ,,ვიცი რომ მისმენენ და პირდაპირ ვაცხადებ, გარეჯის დათმობა და ამათი მთავრობიდან წასვლა ერთი იქნება, აქ კიდევ საერთოდ აზერბაიჯანელი მერი დაგვასვეს, ამათ საერთოდ ღირსება სად აქვთ?”.
ზესტაფონის ეპისკოპოსმა მელქისედეკ ხაჩიძემ მეგობართან [მითითებულია მხოლოდ სახელი და გვარი] საუბრისას უარყოფითად შეაფასა ქვეყანაში შექმნილი ვითარება და განმარტა, რომ მის საცხოვრებელ სახლთან საზამთროს გამყიდველს „მიადგნენე ე.წ ძველი ბიჭები" და აიძულებდნენ დაეთმო ადგილი მათ სასარგებლოდ. ეპისკოპოსი დასძენს - „ვინც მისმენს, მოისმინოს და კარგად გაიგონოს, რომ სახელმწიფოს მართავენ ძველი ბიჭები და კრიმინალები. წინა ხელისუფლების დროს საჯარო მოხელეს კანონის ეშინოდა, დღეს კი ქ.თბილისის მერიაში სამშენებლო ნებართვის ასაღებად საჭიროა 10 ათასი ლარის გადახდა, რითაც საჯარო მოხელეები ჩაფლული არიან კორუფციაში. უშიშროებამაც იცის ყველაფერი, მაგრამ არ რეაგირებს სათანადოდ. მომავალშიც უარესი გველის,გაიყიდება ქართველი კაცი ოქტომბრის არჩევნებში და ქვეყანაში არსებული ვითარება გარგძლედება კვლავინდებურად".
რადიო თავისუფლებამ ასეთი სულ 11 შემთხვევა დაითვალა. წაიკითხე მეტი აქ.
პარლამენტში ნიკა მელიასთვის უფლებამოსილების ვადამდე ადრე შეწყვეტის საკითხს განიხილავენ
პარლამენტის საპროცედურო საკითხთა კომიტეტში „ნაციონალური მოძრაობის“ ლიდერის ნიკა მელიასთვის დეპუტატის უფლებამოსილების შეწყვეტის საკითხს განიხილავენ.
ნიკა მელიამ მანდატზე უარი 29 ივლისს თქვა, მას მერე, რაც „ქართული ოცნება“ შარლ მიშელის შეთანხმებიდან გამოვიდა.
კომიტეტის მიერ განხილვის შემდეგ საკითხი უახლოეს პლენარულ სხდომაზე გავა.
მანამდე ამავე მოწვევის პარლამენტმა ნიკა მელიას დეპუტატის იმუნიტეტი შეუჩერა, რითაც თებერვალში პროკურატურას მწვანე შუქი აუნთო მელიას დასაკავებლად.
მელიას დეპუტატის მანდატი ერთხელ უკვე შეჩერებული აქვს 2019 წლის დეკემბერში. წინა, მეცხრე მოწვევის პარლამენტში „ქართული ოცნების" უმრავლესობამ მას უფლებამოსილება შეუწყვიტა ბანკ „ქართუს“ გაკოტრების მცდელობის საქმეზე სასამართლოს მიერ გამოტანილი გამამტყუნებელი განაჩენის შემდეგ. თბილისის საქალაქო სასამართლომ აღსრულების ეროვნული ბიუროს ყოფილი ხელმძღვანელი ნიკა მელია დამნაშავედ ცნო სამსახურებრივი უფლებამოსილების ბოროტად გამოყენებაში, 25 ათასი ლარის ჯარიმა დააკისრა და 2 წლის და 3 თვის ვადით ჩამოართვა თანამდებობის დაკავების უფლება.
თვალი ადევნე სიახლეებს ამ თემაზე რადიო თავისუფლების ახალ ამბებში.
საოკუპაციო რეჟიმმა ერთ საათში გაათავისუფლა უკანონოდ დაკავებული საქართველოს მოქალაქე
სახელმწიფო უსაფრთხოების სამსახურმა მედიის წარმომადგენლებს აცნობა, რომ საოკუპაციო რეჟიმის მიერ დაკავებული ზურაბ დოთიაშვილი გათავისუფლებულია.
დოთიაშვილი სოფელ კირბალის მიმდებარე ტყესთან საქონელს აძოვებდა, რა დროსაც დააკავეს.
ე.წ საზღვრის უკანონოდ გადაკვეთის ბრალდებით საოკუპაციო ძალებმა დოთიაშვილი ახლომდებარე ღრომის სამხედრო ბაზაზე გადაიყვანეს და გამოჰკითხეს. შემდეგ კი მისი გათავისუფლების გადაწყვეტილება მიიღეს.
სუს-ის საინფორმაციო-ანალიტიკური დეპარტამენტის დირექტორის, გიორგი საბედაშვილის განცხადებით, უკანონო დაკავებაზე სრული პასუხისმგებლობა ეკისრება რუსეთის ფედერაციას.
ევროპარლამენტი: ევროკავშირი მზად უნდა იყოს არ აღიაროს რუსეთის არჩევნები
ევროპის პარლამენტმა ოთხშაბათს დაამტკიცა ევროკომისიისთვის და ევროსაბჭოსთვის განსაზღვრული რეკომენდაციები რუსეთთან ურთიერთობის საკითხებზე. დოკუმენტი მოიცავს მწვავე ფორმულირებებს რუსეთის ხელისუფლებასთან მიმართებით, სანქციების გამკაცრების მოთხოვნებს და ასევე საუბარს სახელმწიფო სათათბიროს არჩევნების შედეგის შესაძლო არაღიარების შესახებ. დოკუმენტი სარეკომენდაციო ხასიათისაა და მისი შესრულება სავალდებულო არ არის.
კენჭისყრის შედეგები ხუთშაბათს გახდა ცნობილი. დოკუმენტს მხარი დაუჭირა 494-მა დეპუტატმა, წინააღმდეგი იყო 103, თავი შეიკავა 72-მა.
დოკუმენტში მოტანილია ადამიანის უფლებების და საერთაშორისო კანონის დარღვევის ბევრი შემთხვევა, რომლებსაც, ევროპარლამენტის შეფასებით, რუსეთის ხელისუფლება ახორციელებს - მათ შორის ყირიმის ანექსია, ევროკავშირის ქვეყნებში რუსული პროპაგანდა და დეზინფორმაციის გავრცელება, "უცხოეთის აგენტების" შესახებ მიღებული კანონი, ალექსეი ნავალნის მოწამვლა და დაპატიმრება, რეპრესიები პოლიტიკური და სამოქალაქო აქტივისტების წინააღმდეგ, ჩეხეთის ტერიტორიაზე მომხდარი დივერსია.
წაიკითხე მეტი.
ეკლესიის ზარები სოფელ წყალთბილაში - როგორ იგებენ აქაურები ამბებს კოვიდზე
პანდემიის გამო ოთხ კედელში გამოკეტილი სოფელ წყალთბილის მკვიდრები ამბებს ძირითადად ეკლესიის ზარით იგებენ.
ერთი ზარი ლოცვის დაწყებას ნიშნავს, სამი - დაინფიცირებულ ადამიანს. ხოლო, როდესაც წყალთბილაში ეკლესიის ზარი ცხრაჯერ ჩამოჰკრავს, სოფელმა იცის, რომ ვიღაც გარდაიცვალა. ,,გლოვის ზარი ბოლო დროს გახშირდა“, - წუხს 90 წლის ადგილობრივი მკვიდრი აზგენ მოსიგიანი.
წყალთბილა სომხური თემით დასახლებული სოფელია ახალციხიდან 15 კმ-ში, და ზღვის დონიდან 1300 მეტრზე. წყალთბილა, აბათხევი, ნაოხრები, წინუბანი და ჯულღა მეზობელი სოფლებია. აქაურებს კოვიდის არსებობის “ბოლომდე არ სჯერათ”და ვაქცინაციაზე დიდად არ ფიქრობენ, მათ ბევრად უფრო მეტად ის აწუხებთ, რომ 5 სოფელს ერთი საავადმყოფო არ აქვს.
აღუნ ნაჰაპეტიანმა COVID-19 მსუბუქად გასული წლის სექტემბერში გადაიტანა, ის რუსეთიდან საქართველოში დაბრუნებამდე "სპუტნიკ ლაითით“ აიცრა.
"მე ავიცერი, რადგან ახალგაზრდა ვარ, ესენი [მშობლები] მოხუცები არიან, მათ შორის თანმხლები დაავადებებით. რომ ვერ გაუძლონ?! თან გაიგეს, რომ აცრის შედეგად რამდენიმე გარდაიცვალა. ეშინიათ და რა გასაკვირია, რომ არ უნდოდეთ აცრა?“ - ეუბნება აღუნ ნაჰაპეტიანი რადიო თავისუფლებას.
როცა თავისუფლება ცდილობს დააზუსტოს საიდან აქვთ სოფელში ცნობები იმის შესახებ, რომ აცრით რამდენიმე ადამიანი გარდაიცვალა, პირველი ვისაც აქაურები იხსენებენ მეგი ბაქრაძეა. ახალციხელი მედდა, რომელიც ვაქცინაციის დაწყებიდან მესამე დღეს, 2021 წლის 18 მარტს აცრის გაკეთების შემდეგ დაიღუპა. “აცრით გარდაცვალების სხვა შემთხვევები” წყალთბილელებს ინტერნეტში თუ წაუკითხავთ.
წაიკითხე მეტი მაია იველაშილის სტატიაში.
ილონ მასკის კომპანია SpaceX-მა კოსმოსში გაგზავნა მისია, რომელიც მხოლოდ მოყვარული, არაპროფესიონალი ასტრონავტებისგან შედგება.
კანავერალის კონცხიდან ხომალდით Dragon-ი ორბიტისკენ გაემგზავრა 4 კოსმოსური ტურისტი - მისიის დამფინანსებელი, 38 წლის ამერიკელი მილიარდერი ჯარედ აიზეკმანი, 29 წლის მედდა ჰეილი არსენო, 51 წლის გეოლოგი სიან პროკტორი და აშშ-ის არმიის ვეტერანი, 42 წლის ინჟინერი კრის სემბროსკი.
15 სექტემბერს სიუჟეტზე მომზადებისას დაშავდა „მთავარი არხის" ოპერატორი ლევან აბლოთია. ის ჟურნალისტ ბექა ყორშიასთან ერთად ქარელის მერობის კანდიდატზე, ზაზა გულიაშვილზე სიუჟეტს ამზადებდა. „მთავარი არხის“ ინფორმაციით, ოპერატორი „ქართული ოცნების" ქარელის ოფისის მეორე სართულის აივნიდან გადმოაგდეს, რასაც თავად „ქართული ოცნების“ წარმომადგენლები კატეგორიულად უარყოფენ. „ოცნების“ ერთ-ერთი ლიდერის მამუკა მდინარაძის განცხადებით, ოპერატორი შემთხვევით კიბის მოაჯირიდან გადავარდა. ლევან აბლოთია საავადმყოფოდან უკვე გაწერეს. რა მოხდა 15 სექტემბერს ქარელში და რა სახის სიუჟეტის მომზადებას გეგმავდა გადამღები ჯგუფი - ამ თემაზე „რადიო თავისუფლება“ ბექა ყორშიას ესაუბრა. უახლოეს მომავალში რადიო თავისუფლება ასევე შემოგთავაზებთ ზაზა გულიაშვილთან ინტერვიუსაც.