საოკუპაციო ხაზთან საქართველოს მოქალაქეთა შესაძლო დაკავების მცდელობას სუს-ი ეხმაურება
„მინდორში ნადირობისას დავინახე, 6 პირი როგორ წამოვიდა ოკუპირებული ტერიტორიიდან. ორი გერმანული ნაგაზი ჰყავდათ. 50 მეტრით უკან დავიხიე და გავჩერდი. საოკუპაციო ხაზი გადმოკვეთეს და ჩვენი მიმართულებით წამოვიდნენ. ისინი მანქანით წამოვიდნენ. გვდიეს კარგა ხანს, იყო იარაღის დამიზნება, ყვირილი და გინება, სოფელს რომ მივუახლოვდი, თავი დამანებეს და უკან წავიდნენ“, - განაცხადა ვანო მარეხაშვილმა.
ეს ინციდენტი თავის ფეისბუკის გვერდზე ანტისაოკუპაციო მოძრაობის „ძალა ერთობაშია“ ლიდერმა დავით ქაცარავამ გაახმაურა და საქართველოს შინაგან საქმეთა სამინისტრო და სხვა ძალოვანი უწყებები უმოქმედობაში დაადანაშაულა.
მისი თქმით, საქართველოს ძალოვან უწყებებს მიტოვებული აქვს ოკუპაციის ხაზი და ოკუპანტები თავის ნებაზე მათ მიერვე დადგენილ ხაზებს არღვევენ და საქართველოს მოქალაქეებზე ნადირობენ.
29 აგვისტოს ინციდენტის შესახებ განცხადება გაავრცელა სახელმწიფო უსაფრთხოების სამსახურმა.
„მოგეხსენებათ, რომ სამწუხაროდ, საოკუპაციო ხაზს გასწვრივ, საოკუპაციო რეჟიმის წარმომადგენლები, როგორც ოკუპირებულ ტერიტორიაზე, ძალიან იშვიათად ცენტრალური ხელისუფლების კონტროლირებად ტერიტორიებზეც ახორციელებენ უკანონო დაკავებებს. აღნიშნული ინციდენტი, რომლის შესახებაც ინფორმაცია საკუთარ ფეისბუქ გვერდზე გააზიარა კონკრეტულმა პიროვნებამ ჩვენთვის ცნობილი გახდა მხოლოდ მას შემდეგ, რაც აღნიშნულმა პიროვნებამ ეს ინფორმაცია პოლიციას მიაწოდა დაგვიანებით, მხოლოდ მას შემდეგ, რაც ეს ინფორმაცია გაუზიარა კონკრეტულ სამოქალაქო აქტივისტთა ჯგუფს. ჩვენთვის ძალიან სამწუხაროა, რომ იმავე დღეს, დაუყოვნებლივ არ მოხდა პოლიციის ინფორმირება, წინააღმდეგ შემთხვევაში საქართველოს ცენტრალური ხელისუფლება გაატარებდა უფრო ადრე იმ ღონისძიებებს, რომლის გატარება დღეს მიმდინარეობს.
რა თქმა უნდა, ამ ინციდენტს მიეცემა მსვლელობა, ცხელი ხაზის გამოყენებით, მიეცემა მსვლელობა IPRM-ზეც, თავიდან ბოლომდე იქნება გარკვეული საოკუპაიო რეჟიმის წარმომადგენლის აქტივობები, ასევე, აღნიშნულ პირთან მოხდა პოლიციის გასაუბრება და მომავალში ნებისმიერი მსგავსი შემთხვევა, ასევე, გახდება ცენტრალური ხელისუფლების რეაგირების საგანი.
კიდევ ერთხელ, სამწუხაროა, რომ აღნიშნულმა პირმა არ მოახდიანა პოლიციის ინფორმირება.
საოკუპაციო ხაზს გასწვრივ უკანონო დაკავებები არ წარმოადგენს სიახლეს არავისთვის.
ეს არის ოკუპაციის შედეგი, 2008 წლის რუსეთ-საქართველოს ომის შემდეგ დამდგარი და ნებისმიერი მსგავსი შემთხვევა, რომელიც 2008 წლიდან სისტემატურად ფიქსირდება ცენტრალური ხელისუფლების მიერ განიხლება IPRM-ზეც, ცხელი ხაზის მეშვეობით და ჟენევის საერთაშორისო დისკუსიებზეც.
ამავდროულად, ნებისმიერი კომენტარი იმასთან დაკავშირებით, რომ საოკუპაციო ხაზზე არ არის წარმოდგენილი შესაბამისი რაოდენობით პოლიცია, ან არ ხდება პატრულირება ისე, როგორც ეს საჭიროა, არ შეესაბამება სიმართლეს.
საოკუპაციო ხაზზე წარმოდგენილია პოლიცია. 350 კმ-ზე მეტია ცხინვალის მიმართულებით ეს ხაზი. ყველა საჭირო მონაკვეთზე წარმოდგენილია პოლიცია. რა თქმა უნდა თავის დაზღვევა უკანონო დაკავებებისგან და ამაზე სტატისტიკაც მეტყველებს, სამწუხაროდ შეუძლებელია, მაგრამ ნებისმიერ შემთხვევაზე ხდება სათანდო რეაგირება ისევე, როგორც მოხდება ამ შემთხვევაზეც“, - ნათქვამია სუს-ის მიერ გავრცელებულ განცხადებაში.