ავღანეთი დატოვა ბრიტანეთის ბოლო საევაკუაციო თვითმფრინავმა
ახლა წასასვლელად ემზადებიან ბრიტანეთის შეიარაღებული ძალები, რომლებიც ამ შაბათ-კვირას თან წაიყვანენ ავღანეთის მოქალაქეების მცირე ჯგუფს - ამბობს თავდაცვის სამინისტროს პრესმდივანი.
თავდაცვის მინისტრმა, ბენ უოლესმა 27 აგვისტოს თქვა, რომ, მისი შეფასებით, ქვეყნის დატოვება ვერ შეძლო 800-დან 1100-მდე ავღანელმა, რომლებიც ბრიტანეთთან თანამშრომლობდნენ და რომლებსაც ქვეყნის დატოვება ეკუთვნოდათ.
"ყველას გამოყვანა ვერ შევძელით, რაც გულს გვტკენს. ადგილზე რთული გადაწყვეტილებები იყო მისაღები" - უთხრა შეიარაღებული ძალების ხელმძღვანელმა, ნიკ კარტერმა ბიბისის.
ქვეყანაში დარჩენილ ავღანელებს ტვიტერზე განთავსებული ვიდეოთი მიმართა ავღანეთში ბრიტანეთის ელჩმა, ლორი ბრისტოუმ - მისი თქმით, ბრიტანეთს არ დავიწყებია ის ადამიანები, რომლებსაც კვლავ ესაჭიროებათ წასვლა და ის ყველაფერს გააკეთებს მათ დასახმარებლად.