28 აგვისტოს ბრიტანეთი დაასრულებს ავღანეთიდან ევაკუაციის პროცესს
"ვუახლოვდებით ევაკუაციის პროცესის დასასრულს, რომელიც დღის განმავლობაში შედგება. შემდეგ საჭირო იქნება ჩვენი სამხედროების გამოყვანა, დარჩენილი საჰაერო ხომალდით", - უთხრა კარტერმა ბიბისის და დასძინა: "ყველას გამოყვანა ვერ შევძელით, რაც გულს გვტკენს. ადგილზე რთული გადაწყვეტილებები იყო მისაღები".
აშშ და მისი მოკავშირე ძალები ცდილობენ დაასრულონ თავიანთი მოქალაქეების და საფრთხის ქვეშ მყოფი ავღანელების ევაკუაციის პროცესი და ავღანეთიდან გავიდნენ ბოლო ვადამდე, 31 აგვისტომდე. ეს ვადა თალიბანთან არის შეთანხმებული საიმისოდ, რომ ქვეყანა უცხოეთის ყველა სამხედრომ დატოვოს.
პენტაგონის პრესმდივანმა, ჯონ კირბიმ 27 აგვისტოს თქვა, რომ, ვაშინგტონის შეფასებით, ქაბულის აეროპორტს კვლავ ემუქრება "კონკრეტული, სარწმუნო" საფრთხე, მას შემდეგ, რაც 26 აგვისტოს თვითმკვლელი მოიერიშის თავდასხმამ იქ 100-ზე მეტი ადამიანი შეიწირა, 13 ამერიკელი სამხედროს ჩათვლით. ქაბულის აეროპორტთან ათასობით ადამიანია, რომლებიც თალიბანის მიერ ავღანეთის დაპატრონების შემდეგ ქვეყნის დატოვებას ცდილობენ.
აშშ-მა და მისმა პარტნიორებმა 14 აგვისტოს შემდეგ ავღანეთიდან 111,000-მდე ადამიანის ევაკუაცია განახორციელეს, - თქვა თეთრმა სახლმა 27 აგვისტოს.