რა შეიძლება დაკარგოს საქართველომ 19 აპრილის შეთანხმების შეუსრულებლობით - რა არ უნდა გამოგრჩეს 25 აგვისტოს
პრემიერ-მინისტრ ირაკლი ღარიბაშვილთან კიევში გამართული არაფორმალური შეხვედრის შემდეგ ევროპული საბჭოს პრეზიდენტმა შარლ მიშელმა საქართველოს შეთანხმების ერთგულება შეახსენა და ამ კონტექსტში ევროკავშირის ფინანსურ მხარდაჭერაზეც გააკეთა აქცენტი. მიშელმა განცხადება ტვიტერზე გამოაქვეყნა:
„საქართველოს პრემიერ-მინისტრთან, ირაკლი ღარიბაშვილთან ხაზი გაესვა, რომ რეფორმები ახლა საჭიროა ისე, როგორც არასდროს, მიკროფინანსური დახმარების გაცემის თარიღი ახლოვდება და დროა, საქართველოს მთავრობამ აჩვენოს შეთანხმებებისა და რეფორმების დღის წესრიგის ერთგულება“, - წერს ევროპული საბჭოს პრეზიდენტი.
ფაქტია, რომ „ქართული ოცნების“ უმრავლესობა 19 აპრილის შეთანხმებით უკვე კარგა ხანია, არ ხელმძღვანელობს, მაგალითად, როდესაც საქმე ეხება ამავე შეთანხმებით განსაზღვრულ საკონსტიტუციო ცვლილებებს.
თუმცა გუშინ შარლ მიშელს ხელისუფლებიდან უპასუხეს, რომ რეფორმები არ შეწყვეტილა. პრემიერმა ირაკლი ღარიბაშვილმა ტვიტერზე თქვა, რომ ქვეყანა განაგრძობს 19 აპრილის შეთანხმებით გათვალისწინებული რეფორმების გზას.
საგარეო საქმეთა მინისტრმა დავით ზალკალიანმა კი მოგვიანებით დაამატა, რომ რეფორმების განხორციელება პროცესია, რომელსაც ქვეყანა ისევ მიჰყვება.
მიიჩნევს თუ არა დასავლეთი შარლ მიშელის შეთანხმებას ანულირებულად? რა შეიძლება მოხდეს, თუკი „ქართული ოცნება“ თავის პოზიციას არ გადახედავს? რადიო თავისუფლებამ ექსპერტ გია ხუხაშვილს ეს კითხვები დაუსვა. ის მიიჩნევს, რომ გადადგმული ნაბიჯებით შესაძლოა ხელისუფლება იზოლაციამდე მივიდეს.
ამ თემაზე წაიკითხე მეტი ლელა კუნჭულიას სტატიაში.
ირაკლი კობახიძემ სახალხო დამცველს უპასუხა არჩევნების გადადების ინიციატივაზე
„ქართული ოცნების“ თავმჯდომარე ირაკლი კობახიძე გამოეხმაურა სახალხო დამცველის ნინო ლომჯარიას განცხადებებს, რომ მაღალი კოვიდ სიკვდილიანობის პირობებში პოლიტიკურმა ძალებმა უნდა იმსჯელონ არჩევნების გადადებაზე. კობახიძის თქმით არჩევნების გადადება მხოლოდ იმ შემთხვევაში იქნებოდა შესაძლებელი თუ საგანგებო მდგომარეობა გამოცხადდებოდა ქვეყანაში:
„არჩევნების გადადების ერთადერთი სამართლებრივი მექანიზმი არსებობს, ეს არის საგანგებო მდგომარეობის გამოცხადება. როდესაც სახალხო დამცველი საუბრობს საგანგებო მდგომარეობის გამოცხადებაზე, ეს თავისთავად არის უკვე ანომალია. ხედავთ, რომ გაშლილია „ნაცმოძრაობის“ ერთიანი კამპანია არჩევნების გადადების საკითხზე, რაც არის საარჩევნო მარცხის წინასწარი აღიარება“, - თქვა კობახიძემ.
არჩევნების გადადების იდეას რამდენიმე ოპოზიციონერმა ლიდერმაც აუბა მხარი. ერთ-ერთი მათგანი იყო „სტრატეგია აღმაშენებლის“ ლიდერი გიორგი ვაშაძე:
„ამ ვითარებაში, როცა სამედიცინო სექტორი კოლაფსშია, ექიმები ვეღარ აუდიან პაციენტებს, როცა ყოველდღიურად იზრდება ინფიცირებულთა და გარდაცვლილთა რაოდენობა, 7 000 ადამიანი უკვე ემსხვერპლა კოვიდვირუსს, ჩვენ, „სტრატეგია აღმაშენებელი“ მზად ვართ, ავიღოთ პასუხისმგებლობა და მივიღოთ მონაწილეობა საერთო გადაწყვეტილებაში, საერთო დისკუსიაში არჩევნების ჩატარებასთან ან მცირედით გადავადებასთან დაკავშირებით. 2-3 კვირით არჩევნების გადადება ნამდვილად არ შეცვლის ვითარებას და გაცილებით უფრო დიდი ამოცანა გვაქვს დღეს გადასაწყვეტი“, - თქვა ვაშაძემ.
ნინო ლომჯარიამ არჩევნების გადადების ინიციატივა პირველად 23 აგვისტოს გააჟღერა და ამ თემაზე არაერთი პოლიტიკური კომენტარიც გაკეთდა, თუმცა საკითხი მთავრობის საკოორდინაციო საბჭოს განსახილველ თემებში ჯერ არ მოხვედრილა. ამის შესახებ საბჭოსთან არსებული ოპერაციული შტაბის ხელმძღვანელმა გიორგი ღიბრაძემ გუშინ განაცხადა.
წაიკითხე მეტი.
ამ თემაზე ასევე ნახე:
ნინო ლომჯარია: თუ სიცოცხლე საფრთხეშია, დიახ, ჩვენი თავისუფლებებიც შეიძლება შევზღუდოთ!
ეპიდემიოლოგიური მდგომარეობა საქართველოში
დღეს, 25 აგვისტოდან, კვების ობიექტები 23:00 საათის ნაცვლად, 22:00 საათამდე იმუშავებენ, - ამის შესახებ საკოორდინაციო საბჭოსთან არსებული ოპერაციული შტაბის უფროსმა გიორგი ღიბრაძემ განაცხადა, მთავრობის ადმინისტრაციაში გამართულ ბრიფინგზე.
მისივე სიტყვებით, გაგრძელდება კვების ობიექტების დადგენილი რეგულაციების აღსრულების მკაცრი კონტროლი.
ამჟამად საქართველოს სხვადასხვა სამედიცინო დაწესებულებებში 7400 კოვიდინფიცირებული გადის მკურნალობას. მათი 70% ჟანგბადდამოკიდებულია. ჯანდაცვის მინისტრის მოადგილის, თამარ გაბუნიას თქმით ქვეყანაში ჟანგბადის დეფიციტი არ არსებობს.
მისი განცხადებით, კლინიკებთან თანამშრომლობენ ეკონომიკის და საგარეო საქმეთა სამინისტროები, ჟანგბადის დამატებითი მარაგების შემოტანის კუთხით და საქართველოს უკვე ეხმარება აზერბაიჯანი და თურქეთი.
პარალელურად მსოფლიოში დაიწყო საუბარი ვაქცინასთან ერთად კოვიდ საწინააღმდეგო მედიკამენტის შექმნის შესახებ. ჯერ კიდევ აპრილის მიწურულს გამოჩნდა ინფორმაცია, რომ ამერიკული ფარმაცევტული კომპანია „ფაიზერის“ მიერ წარმოებული მედიკამენტი, რომელიც COVID19-ის სამკურნალოდ შეიძლება იქნას გამოყენებული, ამერიკის მოსახლეობისათვის, სავარაუდოდ, წლის ბოლოს იქნება ხელმისაწვდომი. ამის შესახებ განცხადება 28 აპრილს „ფაიზერის“ აღმასრულებელმა დირექტორმა ალბერტ ბურლამ გააკეთა. თუმცა, უახლესი ინფორმაციის თანახმად, რომელიც მედიკამენტის კლინიკური კვლევების ვადებს ეყრდნობა, დიდი ალბათობით, ეს თარიღი მომავალი წლისთვის გადაიწევს. თუმცა, მეცნიერების მოლოდინები დამაიმედებელია.
შეცვლის თუ არა თამაშის წესებს მედიკამენტი კორონავირუსის წინააღმდეგ? ვრცლად წაიკითხე ნინო თარხნიშვილის სტატიაში.
ბრიტანეთი აცხადებს, რომ ქაბულიდან ევაკუაციის ბოლო ვადა ალბათ არ გადაიწევს
ბრიტანეთის თავდაცვის მინისტრმა ბენ უოლესმა განცხადებით, „ნაკლებად სავარაუდოა“, რომ ქაბულის აეროპორტიდან ევაკუაციის ბოლო ვადამ 31 აგვისტოს შემდეგ გადაიწიოს.
აშშ-ის პრეზიდენტი ჯო ბაიდენი ზეწოლის ქვეშაა, რომ გაზარდოს ევაკუაციისთვის განკუთვნილი დრო, რადგან ავღანეთის დატოვებას კიდევ ათასობით ადამიანი ცდილობს.
თალიბანმა განაცხადა, რომ 31 აგვისტოს ვადის გადაწევა მათთვის „წითელი ხაზია“.
უოლესმა თქვა, რომ ბოლო ვადა არ შეიცვლებოდა „არა მხოლოდ თალიბანის პოზიციის გამო, არამედ პრეზიდენტ ბაიდენის საჯაროდ გაკეთებული განცხადებებიდან გამომდინარე“. თუმცა მან დასძინა, „მცდელობა ნამდვილად ღირს და ჩვენც ასე მოვიქცევით“.
თვალი ადევნე სიახლეებს ამ თემაზე რადიო თავისუფლების ახალ ამბებში.
როგორ ავიცერი - ორსული და ლაქტაციის პერიოდში მყოფი ქალების ამბები
თუ შარშან, კოვიდინფექციით ერთი ორსული გარდაიცვალა 2021 წელს 8 ასეთი შემთხვევა დადასტურდა. იმატა კორონავირუსით ბავშვთა ინფიცირების რიცხვმაც.
სოციალურ ქსელში ორსული ქალები, რომლებიც აიცრნენ სხვებსაც მოუწოდებენ იგივე ნაბიჯის გადადგმისკენ, საკუთარი თავისა და შვილების უსაფრთხოებისთვის.
36 წლის მაგდა ნებიერიძე ერთ-ერთი მათგანია. ის ონკოლოგიური პაციენტია, შესაბამისად, საქართველოში კორონავირუსის გავრცელების შემდეგ განსაკუთრებით იზოლირებულია გარემოსგან.
მაგდა ვაქცინაციას ორჯერ ეცადა, თუმცა გაზაფხულზე მას ექიმებმა თავის შეკავება ურჩიეს - „ცოტა ხანი მოვიცადოთ, მოდი იმშობიარე და მერე გაიკეთე ვაქცინაო“, თუმცა მას შემდეგ რაც ქვეყანაში ვითარება მკვეთრად შეიცვალა, გაიზარდა ინფიცირებისა და ყოველდღიური გარდაცვალების შემთხვევები, გაჩნდა მეტი ინფორმაცია და კვლევები ორსულებისა და ლაქტაციის პერიოდში აცრილი დედების შესახებ. მაგდას ექიმების განწყობაც შეიცვალა.
აცრისგან თავის შეკავებას მხოლოდ მაგდას არ ურჩევდნენ, სოციალურ ქსელში დაბნეულები არიან ისინიც, ვინც ორსულობას გეგმავს, ექიმი კი ურჩევს აცრის შემდეგ კიდევ 2 თვე “დააკვირდეს”, თუმცა უცნობია რას.
ექიმები ამბობენ, რომ არც ორსულებისთვის და არც ლაქტაციის პერიოდში მყოფი დედებისთვის „ფაიზერით“ ვაქცინაციას უკუჩვენება არ აქვს.
წაიკითხე მეტი ანი ბურდულის სტატიაში.
დანიელ ჭონქაძის 12 ნომერში მდებარე არტნუვოს სტილის სახლი ავარიულ მდგომარეობაშია. კედლებიდან და ჭერიდან ყოველ დღე სახლის ფრაგმენტები ცვივა. ეს ისტორიული შენობა წლებია შეკეთებას ელოდება.
1914 წელს თბილისელ თამბაქოს მწარმოებელ, ნიკოლოზ ბოზარჯიანცს ის არქიტექტორ მიხეილ ოჰაჯანოვისთვის დაუკვეთავს და მშენებლობისთვის არც სახსრები დაუზოგავს. სახლის მოსაპირკეთებლად მასალა პარიზიდან და ვენეციიდან ჩამოუტანიათ.
1915 წელს შენობა საუკეთესო საცხოვრებელ სახლზე გამოცხადებული კონკურსის ვერცხლის მედლის მფლობელი გახდა, თუმცა იმის გამო რომ პირველი ადგილის მფლობელი ვერ გამოავლინეს, შენობა მაინც საუკეთესოდ ჩაითვალა.
რა ბედი ელის გაბზარულ კედლებიან ისტორიულ შენობას? წაიკითხე და ნახე მეტი მზია საგანელიძის ფოტო რეპორტაჟში.
საქართველოში დღეს კოვიდის პანდემიას ძირითადად ე.წ. "დელტა შტამი" განსაზღვრავს. უფრო მეტიც, დადასტურებულია "დელტა +"-ის შემთხვევებიც. რა ვიცით დელტა შტამის შესახებ და რით განსხვავდება "დელტა" კორონავირუსის პირველი შტამისგან? რომელი ვაქცინაა ყველაზე ეფექტიანი ამ განსაკუთრებით გადამდები შტამის მიმართ? გვესაუბრება პირველი საუნივერსიტეტო კლინიკის ინფექციონისტი ელენე პაჭკორია.