მსგავსი ანტისახელმწიფოებრივი პროვოკაცია არც ერთმა ხელისუფლებამ არ უნდა გაიმეოროს - ღარიბაშვილი აგვისტოს ომზე
„ჩვენი გმირების წინაშე აღარ მინდა ვილაპარაკო იმ პოლიტიკურ პასუხისმგებლობაზე, რომელიც ეკისრება წინა ხელისუფლებას. ამის თაობაზე ჩვენ გავაკეთეთ შეფასება და ვერდიქტი გამოტანილი აქვს ქართველ ხალხს“, - ამბობს ღარიბაშვილი და იქვე ამატებს: „მსგავსი ანტისახელმწიფოებრივი პროვოკაცია არასოდეს აღარ უნდა გაიმეოროს არც ერთმა ხელისუფლებამ“.
მუხათგვერდის ძმათა სასაფლაოზე მისულმა პრემიერმა ჟურნალისტების კითხვის პასუხად თქვა, რომ თარიღებით სპეკულირება სირცხვილია და „სააკაშვილის ხელისუფლება ყოველთვის 8 აგვისტოს აღნიშნავდა ომის წლისთავს და ეს იყო დამკვიდრებული პრაქტიკა და ტრადიცია“.
ღარიბაშვილის მტკიცებით, ხელისუფლებას აქვს პრაგმატული და გონივრული პოლიტიკა ოკუპაციის დასაძლევად, დეოკუპაციის მისაღწევად.
„ჩვენი მმართველობის პერიოდი გამორჩეულია იმითაც, რომ ჩვენ ხალხს და ჩვენს ქვეყანას ავარიდეთ კიდევ უფრო მეტი ესკალაცია, მეტი სირთულეები და ავარიდეთ ომი და ის ნგრევა, რაც მოაქვს ომს. ჩვენი მიზანმიმართული, თანმიმდევრული და მშვიდობიანი პოლიტიკით, მე მჯერა, რომ დადგება დრო, როცა ჩვენი ქვეყანა გამთლიანდება“, - განაცხადა მან.