ბორჯომში, მკვლელობაში ბრალდებული სასულიერო პირი სასამართლომ პატიმრობაში დატოვა

ბორჯომში, მოსამართლე მარიკა ჩიტაშვილმა გაიზიარა ბრალდების მხარის არგუმენტები და მკვლელობაში ბრალდებული სასულიერო პირი ანტონ მაისურაძე პატიმრობაში დატოვა.

ადვოკატი სოსო ხითარიშვილი მუხლის შეცვლას ითხოვდა და ამტკიცებდა, რომ მაისურაძემ ჩაიდინა არა მკვლელობა, არამედ აუცილებელი მოგერიება.

მისი თქმით, მაისურაძესთან სახლში - „უმნიშვნელო წყენის გამო“ მისი მოკვლის მიზნით - მივიდა „კბილებამდე შეიარაღებული“ ლევან ნამგალაძე, მისი ბავშვობის მეგობარი. მაისურაძემ წინააღმდეგობა გაუწია, რის გამოც ნამგალაძემ, მეტსახელად „მჭიდომ“, ჯერ ავტომატი გაისროლა, ხოლო მოგვიანებით მისი მოკვლა დანით სცადა.

„შელაპარაკების დროს, როდესაც ანტონ მაისურაძე ცდილობდა გარდაცვლილის განეიტრალებას, სავარაუდოდ, მისი დაჭრა ამ დროს მოხდა. რა დროსაც პირველი, რაც ჩემი დაცვის ქვეშ მყოფმა გააკეთა, ის იყო, რომ საავადმყოფოში მიიყვანა და შემდეგ ეკლესიაში წავიდა. ნამგალაძის გარდაცვალების ამბავი მან სწორედ ტაძარში შეიტყო და პირდაპირ ბორჯომის პოლიციაში მივიდა“, - აღნიშნა სოსო ხითარიშვილმა.

ადვოკატის განცხადებას ბრალდებულმა დაამატა, რომ მისი უდანაშაულობის დადასტურება ბორჯომის კლინიკის კამერითაც შეიძლება.

„როდესაც კლინიკაში მივიყვანე, დაჭრილმაც კი ორჯერ დამარტყა დანა და მემუქრებოდა, რომ მაინც მომკლავდა. ეს ვიდეოკამერებშიც იქნება, თუ გამოითხოვთ. ორ ადგილას დამარტყა დანა. ჩემ ადვოკატს გამორჩა, რომ ეკლესიაში წასვლამდე, მე ჯერ შემთხვევის ადგილზე მივედი, რადგან ავტომატის გასროლის შემდეგ, ის ორი ადამიანი, ვინც გვახლდა, არ ვიცოდი, ცოცხლები იყვნენ თუ არა. როდესაც გავარკვიე, მაშინვე ტაძარში წავედი, მერე კი პოლიციას ჩავბარდი“, - თქვა პროცესზე ანტონ მაისურაძემ.

ბრალდებულმა სასამართლოს შინაპატიმრობა სთხოვა, რადგან, მისივე თქმით, დაავადებულ დედას სხვა მომვლელი არავინ ჰყავს და ბორჯომშიც სწორედ ამისთვის დაბრუნდა. თუმცა მოსამართლემ მისი თხოვნა არ გაითვალისწინა.

მომდევნო სასამართლო პროცესი 29 სექტემბერს, 11:00 სთ-ზე ჩაინიშნა.