თალიბანი აცხადებს, რომ ბრძოლების შედეგად ხელთ იგდეს პროვინცია ყუნდუზის დედაქალაქი
ავღანეთის ხელისუფლების წარმომადგენლები ამ ინფორმაციას არ ადასტურებენ და აცხადებენ, რომ თალიბებმა შეძლეს კონტროლის დამყარება ქალაქის რამდენიმე მნიშნელოვან ნაწილზე, საიდანაც სამთავრობო ჯარები ექსტრემისტების უკუგდებას ცდილობენ.
ყუნდუზის პროვინციის საბჭოს წევრმა გულამ რაბანი რაბანიმ რადიო თავისუფლებას უთხრა, რომ თალიბებმა დაიკავეს ქალაქში მდებარე ციხე და ადგილობრივი მთავრობის ოფისისა და პოლიციის შტაბის ხელში ჩაგდების მიზნით აგრძელებენ იერიშებს.
„სასტიკი ბრძოლები მიმდინარეობს ქალაქის სხვადასხვა ნაწილებში თითოეულ ქუჩისთვის. ავღანეთის უსაფრთხოების ძალების ზოგიერთმა დანაყოფმა ქალაქის აეროპორტისკენ დაიხია“, - განაცხადა ყუნდუზის ადგილობრივი საბჭოს კიდევ ერთმა წევრმა ამრუდდინ ვალიმ.
ავღანეთის არმიის სარდლობის წარმომადგენლის, ტაი მოჰამადის ცნობით, მძიმე ბრძოლების შედეგად, რომელიც 24 საათის განმავლობაში გრძელდება მტერმა დიდი დანაკლისი განიცადა.
ქალაქ ყუნდუზზე თალიბების მიერ 6 აგვისტოს დაწყებული იერიშის შედეგად დაღუპულია სულ მცირე 11 და დაჭირილია 39 ადამიანი.
მანამდე თალიბანმა 6 და 7 აგვისტოს ორი პროვინციის დედაქალაქებზე დაამყარა კონტროლი.
უსაფრთხოების მდგომარეობა ავღანეთში უკიდურესად გაუარესდა მას შემდეგ, რაც 1 მაისიდან აშშ-მა და კოალიციაში შემავალმა სხვა ქვეყნებმა ოფიციალურად დაიწყეს ავღანეთიდან გასვლა, რაც აგვისტოს ბოლოს უნდა დამთავრდეს.
ავღანეთში უსაფრთხოების მდგომარეობის გაუარესების გამო, აშშ-მა და დიდმა ბრიტანეთმა 7 აგვისტოს გამოაქვეყნეს რეკომენდაციები, რომელშიც საკუთარ მოქალაქეებს მოუწოდებენ, რომ კომერციული ავიარესიებით დაუყოვნებლად დატოვონ ავღანეთი.