ღარიბაშვილი: საქართველოში 1 000 000 დოზა ვაქცინა ჩამოვიდა
ჩამოსული ვაქცინები "სინოფარმი" და "სინოვაკია". როგორც პრემიერმა თქვა, 5 ივლისიდან უკვე შესაძლებელი იქნება ვაქცინაციის დაწყება.
რეგისტრაცია ხვალ, 3 ივლისს დაიწყება.
მისივე თქმით, რამდენიმე კვირაში საქართველოში შემოვა კიდევ ამდენივე დოზა ჩინური წარმოების ვაქცინები.
"ჩვენი წარმატებული მოლაპარაკების შედეგად კონტრაქტი გაფორმდა, ფული გადახდილი გვაქვს. "ფაიზერი" ივლისიდან ეტაპობრივად დაიწყებს აღნიშნული მილიონი დოზის მოწოდებას. ჯამში ჩვენ ველოდებით, რომ წლის ბოლომდე 4 მილიონამდე დოზას მივიღებთ", - თქვა ღარიბაშვილმა.
მისი თქმით, ამ ვაქცინების რაოდენობით შესაძლებელი იქნება სამიზნე აუდიტორიის მოცვა. ქვეყანა გეგმავს, ვაქცინა მოსახლეობის 60 პროცენტს გაუკეთოს.
"გამოვიჩინოთ პასუხისმგებლობა და ამ პროცესში გადამწყვეტია მოსახლეობის ჩართულობა, ერთი მხრივ, უნდა დავიცვათ საკუთარი თავი და ჯანმრთელობა, მეორე მხრივ, ჩვენ გარშემო მყოფების მიმართ უნდა გამოვიჩინოთ სოლიდარობა", - თქვა ღარიბაშვილმა.
ამ დროის მონაცემებით, საქართველოში ვაქცინაციის პროცესი პრაქტიკულად შეჩერებულია. დარჩენილია მხოლოდ "სინოვაკის" წარმოების ვაქცინები.