აშშ-ის სახელმწიფო დეპარტამენტი: საქართველო ტრეფიკინგთან მებრძოლი ქვეყნების უმაღლეს საფეხურზე რჩება
უმაღლეს კატეგორიაში მოხვედრა არ ნიშნავს, რომ, აშშ-ის სახელმწიფო დეპარტამენტის შეფასებით, ქვეყანაში ტრეფიკინგის პრობლემა არ არსებობს, ან რომ ქვეყანა საკმარისს აკეთებს ამ დანაშაულთან საბრძოლველად. პირველი კატეგორია მიუთითებს, რომ მთავრობა გარკვეულ ძალისხმევას მიმართავს პრობლემასთან საბრძოლველად და წლიდან წლამდე შესამჩნევ პროგრესს აჩვენებს.
ანგარიშში ნათქვამია, რომ საქართველოს მთავრობა „სერიოზულ და თანმიმდევრულ“ ძალისხმევას მიმართავდა ტრეფიკინგთან საბრძოლველად, განსაკუთრებით, COVID-19-ის პანდემიით გამოწვეული დაბრკოლებების გათვალისწინებით. ეს ძალისხმევა გულისხმობს ადამიანით ვაჭრობაში ჩართულთა გასამართლებას და მსხვერპლთა დახმარებას. სახელმწიფო დეპარტამენტი აღნიშნავს, რომ საქართველოს მთავრობამ შექმნა სახელმძღვანელო პრინციპები მსხვერპლთა იდენტიფიკაციის მობილური ჯგუფებისთვის და შეიმუშავა 2021-2022 წლების ეროვნული სამოქმედო გეგმა.
ამავე დროს, აშშ-ის სახელმწიფო დეპარტამენტი წერს: „მიუხედავად იმისა, რომ მთავრობა აკმაყოფილებს მინიმალურ სტანდარტს, მან წელს უფრო ნაკლები რაოდენობის ეჭვმიტანილი გამოიძია და ნაკლები მსხვერპლის იდენტიფიცირება მოახდინა“. ასევე, საქართველოს არ დაუწესებია სამუშაო უფლების მიღების სისტემა მიგრანტი მუშებისათვის და არ ჩამოუყალიბებია რეკრუტირების სააგენტოების ლიცენზირებისა და მონიტორინგის სისტემა. ზოგ შემთხვევებში პრობლემა იყო გამჭვირვალობის ნაკლებობაც.
ანგარიშში აღნიშნულია, რომ ადამიანით მოვაჭრეების მსხვერპლნი ხდებიან როგორც უცხოელები, რომლებიც საქართველოში ჩამოჰყავთ, ისე ქართველები, რომლებსაც საზღვარგარეთ მუშაობას აიძულებენ. ქართველი გოგონები და ქალები მოტყუებით მიჰყავთ კვიპროსში, ეგვიპტეში, თურქეთსა და არაბთა გაერთიანებულ საამიროებში. თბილისსა და ბათუმში კი ადამიანით მოვაჭრეებს ქალები ჩამოჰყავთ აზერბაიჯანიდან და ცენტრალური აზიიდან და მათ საუნებში, ბორდელებში, სტრიპტიზ-კლუბებსა და კაზინოებში მუშაობას აიძულებენ.
აშშ-ის სახელმწიფო დეპარტამენტი წერს, რომ არ აქვთ ინფორმაცია საქართველოს რუსეთის მიერ ოკუპირებული რეგიონების შესახებ. საქართველოს მთავრობა და ადგილობრივი არასამთავროები კი ოკუპირებული ტერიტორიებიდან იძულებით გადაადგილებულ პირებს განსაკუთრებულად მოწყვლად ჯგუფებად მიიჩნევენ ამ მხრივ. ანგარიშში აღნიშნულია, რომ აფხაზეთში მომუშავე ჩრდილოეთი კორეელებს შესაძლოა ჩრდილოეთ კორეის მთავრობა აიძულებდეს მუშაობას.
სახელმწიფო დეპარტამენტი საქართველოს ურჩევს, უფრო აქტიურად გამოიძიოს და დასაჯოს ადამიანებით მოვაჭრეები, უფრო მეტი ძალისხმევა მიმართოს განსაკუთრებით, სექსუალური და შრომითი ექსპლუატაციის ქართველ და უცხოელ მსხვერპლთა გამოსავლენად, უზრუნველყოს დაზარალებულთა მონაწილეობა გამოძიებასა და სასამართლო განხილვებში, აამაღლოს სამართალდამცავთა შესაძლებლობები და კვალიფიკაცია ფულის გათეთრების და ორგანიზებული დანაშაულის გამოძიების საკითხებში, გაზარდოს ტრეფიკინგის წინააღმდეგ ბრძოლის უწყებათაშორისი საბჭოს მუშაობის გამჭვირვალობა და რეგულარულად გამოაქვეყნოს ინფორმაცია საქმიანობაზე, რომელსაც მთავრობა ტრეფიკინგთან საბრძოლველად ეწევა.