ენმ სასამართლოში "კლანური მმართველობის" შესასწავლად საგამოძიებო კომისიის შექმნას ითხოვს
![ენმ სასამართლოში](https://gdb.rferl.org/7c0299bf-a862-4014-9169-195fc9c5b88a_cx0_cy18_cw0_w800_h450.jpg)
პარლამენტში ყველაზე დიდი ოპოზიციური ფრაქცია "ნაციონალური მოძრაობა - ძალა ერთობაშია" პარლამენტში სასამართლო საკითხებზე საგამოძიებო კომისიის შექმნის ინიციატივით გამოდის. ინფორმაცია მედიას პარტიის ლიდერებმა ხატია დეკანოიძემ და ლევან ბეჟაშვილმა მიაწოდეს.
"რომელიც შეისწავლის კლანურ მმართველობას საერთო სასამართლოებში, რომელიც დაადგენს პოლიტიკურ გადაწყვეტილებებს და მართლმსაჯულების მიმართულებით კლანის გადაწყვეტილებებს და ყველაზე მნიშვნელოვანია, რომ ეს ანგარიში შემდეგ გადაეგზავნებათ ჩვენს საერთაშორისო პარტნიორებს", - თქვა პარლამენტის წევრმა "ნაციონალური მოძრაობიდან" ხატია დეკანოიძემ.
"ქართული ოცნება" ამ საგამოძიებო კომისიის შექმნას პოლიტიკურ კამპანიას უწოდებს. მმართველი პარტიის ლიდერი ირაკლი კობახიძე ამბობს, რომ ამ პოლიტიკურ კამპანიაში არ ჩაერთვებიან, თუმცა შეასრულებენ რეგლამენტის მოთხოვნებს.
"რაც უნდა, ის გამოიძიონ, ნახავენ, რომ ყველაფერი იქნება სუფთა", - თქვა კობახიძემ.
სასამართლოში კლანურ მმართველობაზე არასამთავრობო ორგანიზაციები წლებია საუბრობენ. ერთ-ერთი, ვინც ამას ღიად აფიქსირებდა, იუსტიციის უმაღლესი საბჭოს არამოსამართლე წევრი ნაზი ჯანეზაშვილიც იყო.