ირაკლი კობახიძე: „ნამახვანჰესის“ აქციას ძლიერი დამფინანსებელი ჰყავს
მისი შეფასებით, ასეთ დროს ფინანსური გამჭვირვალობა მნიშვნელოვანია და უარი თქმა ამ თანხების დეკლარირებაზე, კობახიძის სიტყვებით, არასწორია.
„იყო მცდელობა, რომ აქციას დესტრუქციული სახე მიეღო და კარგია, რომ თბილისში ე.წ. პარალიზების მცდელობას აღარ ყოფილა. ეს იყო რაციონალური გადაწყვეტილება, იმედია, ასეთივე რაციონალურ გადაწყვეტილებას მიიღებენ აქციის ორგანიზატორები ამ შემთხვევაშიც“, - განაცხადა „ქართული ოცნების“ თავმჯდომარემ.
„რიონის ხეობის მცველების“ წარმომადგენლის, ვარლამ გოლეთიანის თქმით კი, ხეობის მცველები გეგმავენ ყველა იმ წყაროს და კერძო პირის შესახებ ინფორმაციის გასაჯაროვებას, ვინც მათ თანხებს ურიცხავს.
გოლეთიანი მოუწოდებს პოლიტიკოსებსა და იმ მოქალაქეებს, ვისაც „რიონის ხეობის მცველების“ დამფინანსებლებში ეჭვი შეაქვთ, თავადაც გაასაჯაროვონ საკუთარი დაფინანსების წყაროები.
„ჩვენ გამოვდივართ ინიციატივით - დავდებთ ფინანსების წყაროებს, საიდანაც მოდის ეს თანხები. თუმცა, აქამდეც ვამბობთ, რომ ესენი არიან ემიგრანტები და ჩვენი თანამოქალაქეები. ეს დასაბუთდება, როცა ამ ყველაფერს გავასაჯაროვებთ. შემდეგ კი მოვუწოდებთ ყველა იმ ადამიანს, ვინც ჩვენზე ამბობს, საიდან ფინასდებიანო, რომ თავადაც გაასაჯაროვონ საკუთარი ფინანსები“.
ვარლამ გოლეთიანის სიტყვებით, თანხა მოქალაქეების მიერ ჩარიცხული 5 და 10 ლარის შეწირულობით გროვდება.
„რაც შეეხება ჩვენს დანახარჯს თბილისის აქციაზე, ჩვენ თანხა არაფერში, მათ შორის, არც ტრანსპორტირებაში არ გადაგვიხდია, მხოლოდ სცენაში გადავიხადეთ, რომელიც ჯამში დაახლოებით 25 ათასი დაჯდა“. - აცხადებს ვარლამ გოლეთიანი.
"ნამახვანჰესის" მშენებლობის მოწინააღმდეგეთა მიერ თბილისში აქციების გამართვის დაწყების შემდეგ არაერთი კითხვა დაისვა ფინანსების მოძიებასთან დაკავშირებით. აქციაზე ლევან ვასაძის გამოჩენის შემდეგ კი ერთ-ერთ ვერსიად მისი მხრიდან აქციის დაფინანსება განიხილებოდა.
აქციის ორგანიზატორებმა სწორედ ამის შემდეგ გადაცხადეს, რომ ისინი მზად არიან გაასაჯაროონ იმ პირების ვინაობა, ვინც მათ თანხა გადაურიცხა.