განათლების სამინისტრო მოსწავლეებს მედლებით სკოლის დამთავრებიდან 2 წლის შემდეგ დააჯილდოებს
სამინისტროს წარჩინებული მოსწავლეები არ დაუჯილდოებია არც 2019-2020 სასწავლო წელსაც. 4 ათასზე მეტი მოსწავლე ჯილდოს დაახლოებით 1 წლის დაგვიანებით მიიღებს, მაშინ, როცა უწყებას უკვე ახალი კურსდამთავრებულებისთვის ექნება მედლები შესაძენი.
"იმისთვის, რომ განხორციელდეს მოსწავლეების აკადემიური მოსწრების წახალისება და ამაღლებულ იქნას მოტივაცია მნიშვნელოვანია შესყიდულ იქნას 2017-2018, 2018-2019 და 2019-2020 სასწავლო წლებში წარჩინებით კურსდამთავრებულთათვის ოქროს (მოოქროვილი) და ვერცხლის (მოვერცხლილი) მედლების და მედლის ჩასადები ყუთები", - ვკითხულობთ განათლების სამინისტროს მიერ შესყიდვების სააგენტოსთვის მიწოდებულ ინფორმაციაში.
უწყება სულ 8735 მედის შეძენას აპირებს, საიდანაც 6 ათასზე მეტი "ოქროს მედალია" დარჩენილი 2 ათასზე მეტი კი "ვერცხლის". შესყიდვების სააგენტოსთვის მიწოდებული ინფორმაციის მიხედვით, უწყება 3 მედალს ყიდულობს 2018 წლის კურსდამთავრებულებისთვის. როგორც სამინისტროს პრესსამსახურში განმარტეს, ამ სამმა მოსწავლემ მედლები შედეგების გასაჩივრების შემდეგ მოიპოვეს.
განათლების სამინისტროს პრესსამსახურში არ აქვთ პასუხი, რატომ გადაწყდა კურსდამთავრებულებისთვის "წამახალისებელი ჯილდოს" ორი წლის შემდეგ გადაცემა.