აშშ-ის მთავრობამ მოიპოვა იმ ჟურნალისტების სატელეფონო მონაცემები, რომლებიც აშუქებდნენ ტრამპის კამპანიის კავშირებს რუსეთთან
როგორც ჩანს, ამ ნაბიჯის მიზანი იყო იმ წყაროების დადგენა, რომლებსაც რეპორტიორები ეყრდნობოდნენ 2017 წელს გამოქვეყნებულ სტატიებში. ეს მასალები იბეჭდებოდა ტრამპის ადმინისტრაციის პირველ თვეებში, მაშინ, როცა ფედერალური გამომძიებლები იკვლევდნენ, იყო თუ არა ტრამპის 2016 წლის კამპანია კოორდინაციაში რუსეთთან, არჩევნების შედეგზე გავლენის მოხდენის მიზნით.
გამოცემა წერს, რომ ჟურნალისტებმა მიმდინარე კვირაში იუსტიციის სამინისტროსგან შეტყობინება მიიღეს იმაზე, რომ მათი სატელეფონო მონაცემები წაღებულია. გაზეთი წერს, რომ საუბარია პერიოდზე 2017 წლის 15 აპრილიდან 2017 წლის 31 ივლისამდე.
დროის იმ მონაკვეთში „ვაშინგტონ პოსტმა“ დაბეჭდა სტატია აშშ-ის დაზვერვის საიდუმლო დოკუმენტებზე, რომელთა თანახმადაც 2016 წელს ჯეფ სეშნსი - რომელიც მოგვიანებით ტრამპის ადმინისტრაციაში გენერალური პროკურორი გახდა - კამპანიასთან დაკავშირებულ საკითხებზე მსჯელობდა რუსეთის მაშინდელ ელჩთან, სერგეი კისლიაკთან.
ჟურნალისტებისთვის გაგზავნილ წერილებში არ არის დაკონკრეტებული, როდის დაამტკიცა იუსტიციის სამინისტრომ ეს გადაწყვეტილება, თუმცა სამინისტროს პრესმდივანი აცხადებს, რომ ეს 2020 წელს მოხდა. გაზეთის აღმასრულებელი რედაქტორის მოვალეობის შემსრულებელი იუსტიციის სამინისტროსგან მოითხოვს ახსნა-განმარტებას იმაზე, თუ რატომ მოიპოვეს ჟურნალისტების მონაცემები.