ირანის საგარეო საქმეთა მინისტრმა ბოდიში მოიხადა მოკლული გენერლის თაობაზე გაჟონილი კომენტარის გამო
ზარიფმა 2 მაისს ინსტაგრამით გაავრცელა პოსტი, სადაც იმედი გამოთქვა, რომ სოლეიმანის ოჯახი და ირანელი ხალხი მას წინააღმდეგობრივ კომენტარებს აპატიებენ.
გაჟონილმა ჩანაწერმა მძლავრი რეაქცია გამოიწვია ირანში საპრეზიდენტო არჩევნების წინ.
ჩანაწერში ზარიფი კრიტიკას გამოთქვამს დიპლომატიაში ისლამური რევოლუციის გუშაგთა კორპუსის ჩარევის გამო და ბრალს სდებს სოლეიმანის რუსეთთან სეპარატული ურთიერთობის გამო.
ზარიფი ასევე უკმაყოფილებას გამოხატავს იმის გამო, რომ არ აქვს საკმარისი გავლენა ქვეყნის თეოკრატიულ პოლიტიკურ სისტემაზე და აკონკრეტებს, რომ ხშირად მნიშვნელოვანი გადაწყვეტილებების მიღებისას მას განზე ტოვებდნენ.
სოლეიმანი აშშ-ის არმიის დრონიდან გატყორცნილი რაკეტებით იქნა მოკლული ბაღდადში 2020 წლის იანვარში. მას მერე ის წამებულად არის მიჩნეული.
თეირანის პროკურატურამ დაიწყო გამოძიება გაჟონვის ფაქტზე. მკაცრი ხაზის მიმდევრები ზარიფს „ღალატსა“ და სოლეიმანის მიმართ „ცილისწამებაში“ სდებენ ბრალს.
მთავრობის პრესსპიკერმა ალი რაბიეიმ ადრე განაცხადა, რომ „დოკუმენტების ეს ქურდობა შეთქმულებაა მთავრობის, სისტემის, ქმედითი ადგილობრივი ინსტიტუტების სანდოობის, ასევე ჩვენი ეროვნული ინტერესების წინააღმდეგ“ და დასძინა, რომ ირანის პრეზიდენტმა, ჰასან როჰანიმ „დაზვერვის სამინისტროს დაავალა, დაადგინოს ამ შეთქმულებაში მონაწილეები“.
გუშინ საგარეო საქმეთა სამინისტროს პრესსპიკერმა აუდიოჩანაწერს „შერჩეული“ და რედაქტირებული უწოდა და თქვა, რომ ის წარმოადგენს მხოლოდ მონაკვეთს შვიდსაათიანი ინტერვიუსი, რომელიც „კერძო მოსაზრებებს“ შეიცავს.