საქართველოს პატრიარქი სამძიმარს უცხადებს ისრაელის პრეზიდენტს
"თქვენო აღმატებულებავ, მერონის მთაზე გუშინ მომხდარმა უბედურმა შემთხვევამ საყოველთაო მწუხარება და თანაგრძნობა გამოიწვია. ჩვენი მხრიდანაც გამოვხატავთ დიდ გულისტკივილს და გთხოვთ, სამძიმარი გადასცეთ დაღუპულთა ოჯახებსა და ახლობლებს, მთელ ებრაელ ხალხს. დაშავებულებს კი ვუსურვებთ მალე გამოჯანმრთელებას", - ვკითხულობთ ილია II-ის სამძიმარში.
ისრაელის ჩრდილოეთში, ათეულობით ადამიანი დაიღუპა ლაგ ბა-ომერის რელიგიური დღესასწაულის აღნიშვნისას მომხდარი მასობრივი ჭყლეტის შედეგად.
ადგილობრივი მედიის ცნობით, მერონის მთაზე ასვლას ვიწრო გასასვლელით ცდილობდა ათასობით ადამიანი, ძირითადად, ორთოდოქსი ებრაელები. მას შემდეგ, რაც რამდენიმე ადამიანს ფეხი დაუცდა და სხვებიც ჩაითრია, ხალხში პანიკა და ჭყლეტა დაიწყო. უბედური შემთხვევის შედეგად გარდაიცვალა 44 ადამიანი.
ისრაელის პრემიერ-მინისტრმა ბენიამინ ნეთანიაჰუმ მომხდარს უმძიმესი კატასტროფა უწოდა. მერონის მთაზე დღესასწაულის აღნიშვნა იყო ყველაზე მასშტაბური შეკრება მას შემდეგ, რაც ისრაელმა კორონავირუსის ეპიდემიის გამო დაწესებული შეზღუდვები გააუქმა.