"რიონის ხეობის მცველებმა" და მათმა მხარდამჭერებმა ქუთაისის მთავარი გამზირი გადაკეტეს
აქცია ქუთაისში ამ წუთებში მიმდინარეობს. ისმის შეძახილები: „საქართველო, საქართველო!“. აქციის მონაწილეთა ნაწილი ცოცხალ ჯაჭვში ჩადგა.
ორგანიზატორები აცხადებენ, რომ ეს არის ერთგვარი გამაფრთხილებელი აქცია და ხელისუფლებამ უნდა გაიაზროს, რომ უკან არავინ დაიხევს.
„ამას ჩვენ არ შევეგუებით. არ შევეგუებით იმას, რომ ქვეყანაში, რომელიც გვეკუთვნის ჩვენ, ჩვენი უფლებები იყოს ბოლო ადგილზე გადატანილი და პირველ ადგილზე იყოს დაყენებული ვიღაცეების კერძო ინტერესები და მათ შევწიროთ ჩვენი საერთო ინტერესი და ჩვენი სახელმწიფო ინტერესი... შეიძლება მათი ოცნებაა, რომ ეს ასე იყოს, მაგრამ პირობას ვაძლევთ, რომ ეს ასე არ იქნება... საფლავში ჩავყვებით ყველა ამ ადამიანს... ჩვენ არავის პარტიული და პოლიტიკური ნიშნით არ ვებრძვით. ჩვენ ვიბრძვით ჩვენი ინტერესებისთვის“ - განაცხადა ქუთაისში გამართულ აქციაზე საპროტესტო აქციის ერთ-ერთმა ორგანიზატორმა, ვარლამ გოლეთიანმა.
„რიონის ხეობის მცველები“ 23 მაისს მასშტაბური აქციის გამართვას თბილისში გეგმავენ.
ვითარება მას შემდეგ დაიძაბა, რაც თითქმის 6-თვიანი პროტესტის შემდეგ, 24 აპრილს საქართველოს მთავრობამ „ნამახვანჰესთან“ დაკავშირებული განცხადება გამოაქვეყნა. აქციის ორგანიზატორებმა განცხადების შინაარსი გააპროტესტეს.
"რიონის ხეობის მცველების" განცხადებით, ხელისუფლება მათ მოთხოვნებს სრულ იგნორირებას უკეთებს. სოფელ ნამოხვანისკენ წასვლას აქციის ორგანიზატორები 24 აპრილსაც ცდილობდნენ, თუმცა სამართალდამცველებმა მათ ამის საშუალება არ მისცეს.
23 აპრილს „რიონის მცველებმა“ ოთხი მთავარი მოთხოვნა გამოაქვეყნეს:
1. გაწყდეს 2019 წ. 25 აპრილს ხელმოწერილი ხელშეკრულება საქართველოს მთავრობასა და კომპანია „ენკა რინიუებლზს“ შორის მდინარე რიონზე დაგეგმილი ნამოხვანის ჰესების კასკადის მშენებლობის შესახებ და კომპანიამ დატოვოს რიონის ხეობა.
2. გაუქმდეს საქართველოს მთავრობის 2019 წლის 21 ნოემბრის #2405 განკარგულება "სახელმწიფო საკუთრებაში არსებული უძრავი ქონების შპს "ენკა რინიუებლზისათვის" აღნაგობის უფლებით გადაცემაზე თანხმობის მიცემისა და პირდაპირი მიყიდვის ფორმით პრივატიზების შესახებ".
3. გაუქმდეს ნამოხვანის ჰესების კასკადზე 2015 წელს გაცემული სამშენებლო ნებართვა და ყველა სხვა მასზე დაფუძნებული დოკუმენტი.
4. თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა.
24 აპრილს მთავრობის ადმინისტრაციამ გამოაქვეყნა განცხადება „რიონის ხეობის მცველების“ მიერ წამოყენებული მოთხოვნების საპასუხოდ.
ტექსტში ვკითხულობთ, რომ კაშხლის მშენებლობაზე გამოცხადდა მორატორიუმი 9-12 თვით და პრემიერ-მინისტრის დავალებით, იუსტიციის სამინისტრომ უნდა დაიქირაოს საერთაშორისო იურიდიული კომპანია, რომელიც შეისწავლის "კონტრაქტის პირობების საერთაშორისო პრაქტიკასთან შესაბამისობას".
ასევე, მთავრობა აცხადებს, რომ „საქართველოს მთავრობა გააგრძელებს ხელშეკრულების პირობების დაზუსტებას კომპანია „ენკასთან" და "კომპანია ამ ეტაპზე გააგრძელებს მხოლოდ პროექტის პირველი ეტაპის მოსამზადებელ სამუშაოებს ინფრასტრუქტურის მიმართულებით, მოქმედი სამშენებლო ნებართვის ფარგლებში".
„რიონის ხეობის მცველებს“ 24 აპრილს სოლიდარობა გამოუცხადეს საქართველოს მასშტაბით. აქციები გაიმართა: ბათუმში, ქობულეთში, ზუგდიდში, ფოთში, პანკისის ხეობაში, ბოლნისში, რუსთავში, ლანჩხუთში, წყალტუბოში, ლენტეხსა და ყაზბეგში.