სომხეთში გენოციდის დღის აღნიშვნის ფონზე, ელიან ბაიდენის განცხადებას

24 აპრილს აშშ-ის პრეზიდენტი, ჯო ბაიდენი განცხადებით გამოვა, გავრცელებული ხმების ფონზე, რომ ის გენოციდად აღიარებს სომეხთა ხოცვა-ჟლეტას ოსმალეთის იმპერიაში, პირველი მსოფლიო ომის დროს. 

საპრეზიდენტო კანდიდატობის რანგში ბაიდენი აცხადებდა, რომ გადადგამდა ამ, დიდწილად სიმბოლურ ნაბიჯს. მოელიან, რომ ის განცხადებას გაავრცელებს 24 აპრილს, სომეხთა გენოციდის ხსოვნის დღეს. 

სომხები ათწლეულების განმავლობაში ითხოვენ ამ ცნების, გენოციდის გამოყენებას მაშინდელი მასობრივი მკვლელობების და დეპორტაციების აღსაწერად, მაგრამ ამ სიტყვას გადაჭრით უარყოფს თურქეთი.  

თეთრმა სახლმა 23 აპრილს გამოაცხადა, რომ ბაიდენი ელაპარაკა თურქეთის პრეზიდენტს, რეჯეპ ტაიპ ერდოანს. სააგენტო როიტერსი ავრცელებს წყაროებისგან მიღებულ ინფორმაციას, რომ ბაიდენმა ერდოანს შეატყობინა 24 აპრილს გენოციდის აღიარების გეგმის შესახებ. 

პირველი მსოფლიო ომის დროს და მისი დასრულების შემდგომ პერიოდში, ოსმალეთის იმპერიაში თურქებმა დახოცეს ან დეპორტაციას დაუქვემდებარეს 1,5 მილიონი სომეხი - ქრისტიანი უმცირესობა ძირითადად მუსლიმურ იმპერიაში. ბევრი ისტორიკოსი და რამდენიმე ქვეყანა, მათ შორის საფრანგეთი და გერმანია, ამ მკვლელობებს გენოციდად მიიჩნევენ. ანკარა აცხადებს, რომ მკვლელობები სამოქალაქო დაპირისპირების შედეგი იყო და არ წარმოადგენდა ოსმალეთის მთავრობის გეგმას სომეხთა გასანადგურებლად.