"შეზღუდვა არ არსებობს" - ქუთაისის მერი შენობიდან ჟურნალისტის პოლიციის ძალით გამოძევებას ეხმაურება
"ადგილი ჰქონდა შენობის დაცვის თანამშრომლების და ჩემი თანაშემწის შეურაცხყოფას, ჩემს ოთახში შევარდნას. ნამდვილად ცუდი ფაქტი მოხდა, მედიასთან თანამშრომლობისთვის ჩვენ მზად ვართ ყოველთვის, ნებისმიერ დაწესებულებაში გადაადგილება უნდა იყოს ორგანიზებული, შეზღუდვა არ არსებობს არც მერიაში, გვინდა მოქალაქეების და ჟურნალსიტების გადაადგილება შენობაში იყოს მოქცეული კანონის ფარგლებში და ჟურნალისტებისთვის პრესსამსახურთან მიმართვის შემდეგ დაიშვება საშვი", - განაცხადა იოსებ ხახალეიშვილმა.
ამავე ბრიფინგზე ცნობილი გახდა, რომ საკითხის შესასწავლად ადმინისტრაციული წარმოება დაიწყო.
5 აპრილს პოლიციის თანამშრომლებმა ძალის გამოყენებით გამოიყვანეს ქუთაისის მერიიდან "ქუთაისი თუდეის" ჟურნალისტის, ბუბა ჩივაძე, რომელიც იქ შიმშილობის დაწყებას აპირებდა. ჩივაძე მერიის შენობაში მერის იმ განკარგულების გასაპროტესტებლად შევიდა, რომლითაც ჟურნალისტებს საშვის გარეშე ადმინისტრაციულ შენობაში შესვლა აეკრძალათ.
მას რამდენიმე პოლიციელმა ჟურნალისტის ხელებსა და ფეხებზე მოჰკიდა ხელი და ასე გამოიყვანეს შენობიდან. ამ დროს ჩივაძე შეუძლოდ გახდა, რის გამოც ქუთაისის რეფერალურ საავადმყოფოში გადაიყვანეს.
ჟურნალისტ ბუბა ჩივაძის განცხადებით, მას დაზიანებები აქვს კიდურებზე, ექსპერტიზას ჩაიტარებს სახელმწიფო ინსპექტორის სამსახურის წარმომადგენლების თანდასწრებით და ჩვენებას მისცემს სასამართლოს და არა საგამოძიებო უწყებას.