რიონის ხეობის მოსახლე, რომელსაც პურის ყიდვა უნდოდა, პოლიციამ დააკავა, სასამართლომ კი დააჯარიმა
ვიდეოს, რომელიც მირიან მაღლაფერიძემ სოციალურ ქსელებში გაავრცელა და პოლიციელებთან შელაპარაკების ინციდენტს ასახავს, ის თავადვე იღებს. მეზობელ სოფელში მიმავალ გზაზე გადაღება მან პოლიციელების დანახვის შემდეგ დაიწყო. კადრებში ჩანს, რომ პოლიცია მას აჩერებს და სთხოვს პირადობის დამადასტურებელ მოწმობას.
მაღლაფერიძე: აქეთ არ შეიძლება, რომ მივბრძანდე ხიდზე?
პოლიციელი: არა, ვერ გადაიღებ... წადი, სახლში წაბრძანდით!
მაღლაფერიძე: რატომ არ შეიძლება მიბრძანება?
პოლიციელი: იმიტომ, რომ არ შეიძლება...
მაღლაფერიძე: ხომ შეიძლება წავიდე ოფურჩხეთში და ვიყიდო პური?
პოლიციელი: დროებით შეზღუდულია გადაადგილება!
მაღლაფერიძე: მაშინ თქვენ გამეგზავნეთ, თუ შეიძლება, ბოდიშის მოხდით და მომიტანეთ პური, მშიერი მყავს შვილი სახლში.
პოლიციელი: სად გაგეგზავნოთ, ვერ გავიგე?!
ამ დიალოგის შემდეგ სამართალდამცავი ამბობს "ჩამოართვით" და წყდება ვიდეოკადრი.
საია-ს ქუთაისის ფილიალის ხელმძღვანელის ზაალ გორგიძის განცხადებით, ორგანიზაციის ადვოკატები დაიცავენ მირიან მაღლაფერიძის ინტერესებს და ქუთაისის საქალაქო სასამართლოს გადაწყვეტილებას გაასაჩივრებენ.
რიონის ხეობის სოფლებში საპოლიციო ძალები 3 აპრილის დილიდან შევიდა. ეს ის დღეა, როცა ხეობაში "ნამახვანჰესის" მშენებელი კომპანიის ახალი დირექტორი, მერაბ ლომინაძე ჩავიდა.
პოლიციას კონტროლი გაძლიერებული აქვს სოფელ გუმათთან, მეოთხე დღეა "გუმათჰესის" მიმდებარე ტერიტორიაზე რკინის ჯებირები და პოლიციის პიკაპები დგას. ხეობაში შეზღუდულია გადაადგილება, პოლიცია აკონტროლებს ავტომანქანებს და მიკროავტობუსებს და არ ატარებს ადამიანებს, რომლებიც, მათი ეჭვით, შეიძლება სოფელ ნამოხვანში მიდიოდნენ.
იმის გამო, რომ პოლიციამ გზა გადაკეტა, სოფელ გუმათში გაშალეს კარავი ნამახვანჰესის მშენებლობის მოწინააღმდეგეებმა 4 აპრილს. მეექვსე თვეა უწყვეტი პროტესტი მიმდინარეობს სოფელ ნამახვანში გაშლილ კარვებშიც. ხეობაში ხუთი კარავია გაშლილი, სადაც რამდენიმე ათეული აქტივისტი ათევს ღამეს. მათი მოთხოვნაა, გაუქმდეს მთავრობის დადგენილება ჰესის მშენებლობის შესახებ, კომპანია "ენკამ" დატოვოს რიონის ხეობა და გადადგეს ეკონომიკის მინისტრი ნათია თურნავა. სამოქალაქო მოძრაობის "რიონის ხეობის გადარჩენისთვის" წევრებისთვის მიუღებელია მთავრობის ხუთპუნქტიანი შეთავაზება, რადგან, როგორც ისინი აცხადებენ, ხელისუფლების გეგმა მათ მოთხოვნებს არ შეესაბამება.