ჯანდაცვის მინისტრი: ვაქცინის პოპულარიზაციის მიზნით, 100 ცნობილი ადამიანი საჯაროდ აიცრება
„რაც შეეხება 100 ცნობილი ადამიანის ვაქცინაციას, ეს არის სტრატეგიული კომუნიკაციის ერთ-ერთი ნაწილი, რომელიც თვალსაჩინოდ აჩვენებს ჩვენს მოქალაქეებს, რამდენად სანდოა ვაქცინა. რა თქმა უნდა, ინფორმაცია მიეწოდება ყველა იმ ცნობილ პირს, რომელიც დღეს ვაქცინაციაში საკუთარი ნებით ერთვება. თქვენ იცით, რომ ვაქცინაცია ნებაყოფლობითია და ისინი ამას აკეთებენ ჩვენი საზოგადოებისა და ვაქცინაციის პოპულარიზაციისთვის. არანაირი გამორჩევა იმ ნიშნით, რომ ეს ადამიანები არიან ცნობილი და აქედან გამომდინარე, სახელმწიფო მათზე განსაკუთრებით ზრუნავს, ამ კომპონენტში არ არის ჩადებული“, – განაცხადა ტიკარაძემ.
დღესვე ბიოლოგი ლევან ბუთხუზი მოხალისეთა ვაქცინაციის შესახებ შეხვედრაზე იმყოფებოდა დაავადებათა კონტროლის ეროვნულ ცენტრში. ამ შეხვედრის დასრულების შემდეგ ცენტრის ხელმძღვანელმა, ამირან გამყრელიძემაც თქვა, რომ ინიციატივა მისასალმებელია და მას სახელმწიფოს მხრიდან შემხვედრი ნაბიჯები სჭირდება.
საქართველოში 15 მარტიდან მიმდინარეობს ვაქცინაცია "ასტრაზენეკას" ვაქცინით. 30 მარტიდან აცრა დაიწყება "ფაიზერის" ვაქცინითაც. ამ ეტაპზე ჯანდაცვის სფეროს წარმომადგენლები და 65 წელზე უფროსი ასაკის მოქალაქეები იცრებიან.
დაავადებათა კონტროლის ეროვნული ცენტრის მონაცემებით, 26 მარტის 14:00 საათისთვის აცრილთა რაოდენობა 4344-ია, ხოლო ვაქცინაციისთვის დარეგისტრირებულების - 11 273.