ირანი იმეორებს, რომ ბირთვულ პროგრამაზე შეთანხმების გადარჩენა აშშ-ზეა დამოკიდებული
ესმეილ ბაღეი ჰამანემ ეს განცხადება 24 თებერვალს გააკეთა გაეროს ეგიდით გამართულ კონფერენციაზე ჟენევაში.
გუშინ ირანმა ოფიციალურად აკრძალა თავის ბირთვულ ობიექტებზე საერთაშორისო ინსპექციების ჩატარება. ამ გზით ის ცდილობს, ზეწოლა განახორციელოს ევროპის ქვეყნებსა და ვაშინგტონზე, რათა აიძულოს ისინი, გააუქმონ ეკონომიკური სანქციები და აღადგინონ ბირთვული შეთანხმების პირობები.
22 თებერვალს ირანმა დაადასტურა, რომ შეწყვიტა 2015 წლის შეთანხმების დამატებითი ოქმის განხორციელება, რაც ირანის ბირთვული ობიექტების მოულოდნელი ინსპექციების საშუალებას იძლეოდა.
აშშ-ის ყოფილი პრეზიდენტის, დონალდ ტრამპის ადმინისტრაცია 2018 წელს გავიდა ირანის ბირთვული პროგრამის თაობაზე შეთანხმებიდან, რომელიც ითვალისწინებდა ირანის წინააღმდეგ მოქმედი სანქციების უმეტესობის გაუქმებას მისი ბირთვული ამბიციების შეზღუდვის სანაცვლოდ.
აშშ-ის პრეზიდენტ ჯო ბაიდენის ახალი ადმინისტრაცია ცდილობს, ტრამპის ეს გადაწყვეტილება შეაბრუნოს. თუმცა ის გარემოება, რომ ირანი არღვევს 2015 წლის შეთანხმებას და ზღუდავს საერთაშორისო ინსპექციას, ამ ამოცანის სირთულეს ცხადყოფს.