ღარიბაშვილი პარლამენტში შესულ ოპოზიციას უწოდებს "სახელმწიფოებრივად მოაზროვნე ხალხს"
პრემიერობის კანდიდატი მიესალმება ოპოზიციის ექვსი დეპუტატის (ალექსანდრე ელისაშვილი, ლევან იოსელიანი, ფრიდონ ინჯია, დავით ზილფიმიანი, ავთანდილ ენუქიძე, გელა მიქაძე) პარლამენტში შესვლას.
„მე მინდა მოვიწონო სახელმწიფოებრივად მოაზროვნე ხალხის გადაწყვეტილება, ჩვენი ოპოზიციის შემოსვლა პარლამენტში, რაც ერთადერთი, გონივრული და სახელმწიფოებრივი პოზიციაა. აქედან გამომდინარე, ჩვენი შეთავაზება, რა თქმა უნდა, არის ძალაში, მაგრამ ერთი დათქმით, ჩვენ არ დაველაპარაკებით რადიკალურ ადამიანებს. პოლიტიკოსებს, რომლებსაც მხოლოდ საკუთარი ეგოისტური დღის წესრიგი აქვთ, რომლებიც ითხოვენ აბსოლუტურად უარგუმენტოდ რიგგარეშე არჩევნებს. დანარჩენი კი არის შესაძლებელი, ჩვენ მზად ვართ დიალოგისთვის, ჩვენ მზად ვართ დიალოგისთვის, კიდევ ერთხელ მინდა ამ ტრიბუნიდან დავადასტურო აღნიშნული მზაობა. დანარჩენი, რა თქმა უნდა, ჩვენზე არის დამოკიდებული, როგორ გამოვიყვანთ ამ ქვეყანას კრიზისიდან. ჩვენ შეგვიძლია და ამას ძალიან მოკლე ვადებში ვაჩვენებთ, რომ ამ ყველაფრის გაკეთება არის შესაძლებელი“, - აცხადებს ირაკლი ღარიბაშვილი.
საქართველოს პარლამენტი დღევანდელ რიგგარეშე სხდომაზე უყრის კენჭს „ქართული ოცნების“ პრემიერმინისტრობის კანდიდატის, ირაკლი ღარიბაშვილის მიერ ნდობის მისაღებად წარდგენილ მთავრობის შემადგენლობას და 2021-2024 წლების პროგრამას „ევროპული სახელმწიფოს მშენებლობისთვის“.
მთავრობის განახლებული შემადგენლობისთვის ნდობის გამოცხადება საჭირო გახდა მას შემდეგ, რაც 18 თებერვალს გიორგი გახარიამ დატოვა პრემიერ-მინისტრის თანამდებობა და მიზეზად დაასახელა „ნაციონალური მოძრაობის“ თავმჯდომარის, ნიკა მელიას დაპატიმრების საკითხზე აზრთა სხვადასხვაობა მასსა და მმართველი გუნდის სხვა წარმომადგენლებს შორის.
ირაკლი ღარიბაშვილის მიერ წარდგენილ მთავრობაში მას თავდაცვის მინისტრის თანამდებობაზე შეცვლის მინისტრის მოადგილე ჯუანშერ ბურჭულაძე, ხოლო რეგიონული განვითარებისა და ინფრასტრუქტურის მინისტრის თანამდებობაზე მაია ცქიტიშვილს - მინისტრის მოადგილე ირაკლი ქარსელაძე. მთავრობის დანარჩენი შემადგენლობა უცვლელია.
საპარლამენტო საქმიანობაში არ მონაწილეობენ "ნაციონალური მოძრაობა-გაერთიანებული ოპოზიციის", "ევროპული საქართველოს", "სტრატეგია აღმაშენებლის", "ლელოს", "ლეიბორისტული პარტიისა" და "გირჩის" სიებით არჩეული დეპუტატები, რომლებიც 31 ოქტომბრის საპარლამენტო არჩევნებს გაყალბებულად მიიჩნევენ და ვადამდელ არჩევნებს მოითხოვენ.
"ქართული ოცნების" წინააღმდეგ გაერთიანებული ოპოზიცია, რომელიც ვადამდელი არჩევნების ჩასატარებლად ხელისუფლებასთან მოლაპარაკებას მოითხოვს, აცხადებს, რომ მმართველმა პარტიამ პრემიერმინისტრობის ყველაზე დესტრუქციული კანდიდატი შეარჩია.