Лондон суди Жулиан Ассанжни гаров эвазига озод қилишдан бош тортди
Лондон суди 6 январь куни Wikileaks асосчиси Жулиан Ассанжни гаров эвазига озод қилишдан бош тортган. Бу ҳақда Sky News хабар қилди.
Аввалроқ Лондон суди Ассанжни Британиядан АҚШга экстрадиция қилишнинг имкони йўқлигига оид қарор чиқарган. Суд ўз қарорини Ассанжнинг аҳвол-руҳиясини ҳамда АҚШга етиб борганидан кейин ўзини ўлдириши хавфи борлигини эътиборга олган ҳолда чиқарганини билдирган. АҚШ Адлия вазирлиги қарор юзасидан апелляция тартибида шикоят аризаси киритилажагини қайд этган.
Лондон суди қарори бўйича АҚШнинг апелляция аризаси суд томонидан кўриб чиқилгунига қадар Wikileaks асосчиси ҳибсда қоладиган бўлди. Ассанжнинг адвокатлари унинг қочиш эҳтимоли йўқлигини таъкидлаб, ўз ҳимоялари остидаги шахснинг гаров эвазига озод этилишини сўраётган эдилар.
49 ёшли Жулиан Ассанж 2010 ва 2011 йилларда минглаб махфий ҳужжатларни ёйинлагани учун АҚШ адлия тизими томонидан қидирувга берилган. Қўшма Штатлар расмийлари мазкур махфий ҳужжатлар қонунга зид равишда ошкор қилингани ва бу иш кишилар ҳаётига хавф туғдириши мумкин бўлганини айтиб келишади. Ассанж ўзининг сиёсий сабабларга кўра таъқиб қилинаётганини айтиб, экстрадицияга қаршилик қилиб келаётган эди.