Հռոմի Պապի ելույթի անակնկալները եւ սերը հայկական ծիրանի հանդեպ
Ներկայացնում ենք նրա խոսքի առավել կարեւոր հատվածները:
Պապը վերջին պահին իր ելույթում ավելացրել է «ցեղասպանություն» բառը
ՀՀ նախագահի նստավայրում իր ելույթի ժամանակ Հռոմի Ֆրանցիսկոս պապը կիրառել է եւ՛ Մեծ եղեռն, եւ՛ ցեղասպանությունը բառերը՝ նկարագրելու 1915թ.-ի դեպքերը: Պապը նախկինում բազմիցս ասել է, որ դա ցեղասպանություն է եղել: Մենք երբեւէ չենք ժխտել, որ դա այդպես է եւ Նորին Սրբությունը պատճառ չէր տեսնում ցեղասպանություն բառն այսօր էլ չկիրառելու համար:
Պապը նախօրոք հաստատել էր այսօրվա իր ելույթի տեքստը, որի սկզբնական տարբերակում չի եղել «ցեղասպանություն» բառը: Անհերքելի է, որ այսօր նա որոշեց ավելացնել «ցեղասպանություն» բառը նախապես գրված տեքստում: Նա մտածեց դա, եւ որոշեց ավելացնել այդ եւ ուրիշ բառեր: Այդ հարցում նրա վրա որեւէ ճնշում, պարտադրանք չի եղել ոչ մեկի կողմից: Նա պատրաստել էր տեքստը, այն մեզ հանձնել, մենք էլ այն նախապես բաժանել էինք մամուլին: Բայց մենք ձեզ ասել ենք միշտ, որ Պապը իր ելույթներում սովորաբար վերջին վայրկյանին փոփոխություն է անում: Միշտ հորդորել ենք, որ պատրաստ լինեք անակնկալների, քանի որ իր ելույթում նա կարող է որեւէ բան փոխել, եւ անգամ շոկի ենթարկել ոմանց:
Ես ձեզ կոչ եմ արել միշտ ուշադիր լսել Պապի ճառերը: Հորդորում եմ նաեւ հիմա: Վաղը նա դեռ ասելիք ունի:
[[gallery1]]
Թուրքիայի արձագանքի մասին
Ես չեմ կարող Թուրքիայի փոխարեն խոսել: Կարող եմ կրկնել միայն այն, ինչ ասել է Պապը, իսկ նա միշտ խոսում է խաղաղության, ազգերի միջեւ հաշտության, երկխոսության համար: Այս այցի ընթացքում, նա նույնպես նույն ոգով է արտահայտվել: Կան շատ հայեր, ովքեր լավ հարաբերություններ ունեն թուրքերի հետ եւ հակառակը: Անհամեմատ շատ մարդիկ ուզում են խաղաղություն եւ երկխոսություն: Իսկ դրա համար անհրաժեշտ է դասեր քաղել անցյալից, որպեսզի անցյալի սխալները չկրկնվեն:
Պապի այցը նոր քրիստոնյաներ կբերի Հայաստան
Պապը մեծ հարգանքով է վերաբերում Հայաստանի մշակույթին, քրիստոնեական անցյալին, պատմությանը: Դուք անհավատալի պատմություն, իմաստություն ունեք, որը համաշխարհային կարեւորություն ունի: Կարծում եմ, Պապի այցը շատերի համար կբացահայտի հայ ժողովրդի հոգեւոր հարստությունը, եւ վստահ եմ, որ այս այցից հետո շատ քրիստոնյա ուխտավորներ կգան Հայաստան:
Հայկական ծիրանի մասին
Հայկական ծիրանը հայտնի է ողջ աշխարհում: Այսօր, երբ հասանք Էջմիածին, մեր սենյակներից մեկում հայտնաբերեցինք մի սկուտեղ՝ լի այդ սքանչելի մրգով: Մեծ հաճույք ստացանք այն ուտելուց: Պապը լավ իրազեկ է հայկական ծիրանի մասին եւ շատ է այն գնահատում: