ՀՀ նախագահը կարեւորել է ԵԱՏՄ անվտանգության բաղադրիչը
«Մենք անդամակցել ենք Եվրասիական տնտեսական միությանը՝ ելնելով մեր տնտեսական շահերից, մեր քաղաքացիների շահերից: Շատ կարեւոր է, որ ընդունվող որոշումները լինեն շոշափելի գործարար միջավայրի, յուրաքանչյուր ապրանքի գնորդի եւ ծառայության պատվիրատուի համար: Այդ նպատակին հասնելու համար ամենակարեւոր հարցը տեխնիկական խոչընդոտների վերացումն է, որոնք խանգարում են ապրանքների եւ ծառայությունների ազատ տեղաշարժին»,- ասել է ՀՀ նախագահը:
Սերժ Սարգսյանը խնդրել է ԵԱՏՄ-ում նախագահող երկրի՝ Ղազախստանի վարչապետ Կարիմ Մասիմովին ներկայացնել՝ կա՞ արդյոք օրակարգում առկա հարցերի շուրջ ընդհանուր ընկալում, եւ ինչպիսի՞ արդյունքներ են ակնկալվում այս հանդիպումից:
«Մեզ համար առջեւում այսօր աշխատանքային օր է, որի ընթացքում նախատեսված է Եվրասիական տնտեսական միության հետագա զարգացման հետ կապված հարցերի քննարկում: Նախագահների հանդիպման նախօրեին մենք կաշխատենք քննարկել եւ օրակարգից հանել հարցերի մեծամասնությունը, որպեսզի բարձր մակարդակով քննարկմանը ներկայացնենք միայն հետագա զարգացման տեսանկյունից խոշոր ռազմավարական հարցերը», - ասել է Կարիմ Մասիմովը:
ԵԱՏՄ անդամ երկրների տնտեսությունների հետագա բնականոն զարգացման առումով ՀՀ նախագահը կարեւորել է անվտանգության բաղադրիչը եւ այդ տեսանկյունից ներկայացրել ԼՂ հիմնախնդրի շուրջ վերջին զարգացումները: