Ավտոբուսի պայթյունից տուժածների վիճակը գնահատվում է կայուն
Առողջապահության նախարարությունում նշել են, որ առավոտյան ժամը 10:00-ի դրությամբ բոլոր տուժածների առողջական վիճակը գնահատվում է կայուն:
Տուժածների բուժօգնությունը համակարգում է առողջապահության նախարար Արմեն Մուրադյանը, որը տուժածների առողջական վիճակը գնահատելու նպատակով պարբերաբար հրավիրել է բժշկական կոնսիլիումներ:
Վիրահատված 14 եւ 15 տարեկան պատանիների առողջական վիճակում դիտվում է դրական տեղաշարժ: Վիրահատական բարդ միջամտության արդյունքում բժիշկներին հաջողվել է պահպանել պատանիներից մեկի վերջույթը: Առավոտյան տղաները կրկին անցել են բոլոր անհրաժեշտ հետվիրահատական հետազոտությունները, նրանց վիճակը գնահատվում է կայուն ծանր: Երկուսն էլ եկել են գիտակցութան, սակայն մեկը դեռեւս շնչում է արհեստական սարքի օգնությամբ:
Բժշկական անձնակազմի խոսքով` երիտասարդներին հետագայում սպասում են վերականգնողական եւ պլաստիկ կրկնակի վիրահատություններ:
Մյուս տուժածների մոտ առկա են սալջարդեր եւ բեկորային վնասվածքներ: Բոլորի վիճակը բավարար է, կատարվել են անհրաժեշտ հետազոտությունները եւ բժշկական միջամտությունները, նրանք գտնվում են մասնագետների մշտական հսկողության ներքո:
Տուժածներից մեկը 37-ամյա հղի կին է, որի կյանքին եւ պտղին վտանգ չի սպառնում:
Տուժած քաղաքացիներից մեկն այսօր առավոտյան ժամը 4:00-ի դրությամբ է տեղափոխվել բուժհաստատություն: 62-ամյա կնոջ պնդմամբ` ինքը եւս ավտոբուսի պայթյունից է տուժել: Կինը նշել է, որ ինքնուրույն հեռացել է պատահարի վայրից, սակայն ինքնազգացողության վատացման պատճառով դիմել է շտապօգնության ծառայության եւ տեղափոխվել բժշկական հաստատություն: Նրա ինքնության մանրամասները ճշտվում են իրավապահ մարմինների կողմից: