Փոխքաղաքապետը՝ վերելակների, տրանսպորտի եւ պարգեւավճարների մասին
Մեդիամաքսն ասուլիսից առանձնացրել է որոշ հատվածներ:
Ներկայացված բյուջեի պլանը
Մեր ներկայացրած բյուջեի պլանը հրամցվել է կցկտուր տեղեկություններով, ոչ ամբողջական։ Ինչո՞ւ, որովհետեւ երբ մենք պլանավորում ենք 159 միլիոն դրամի ֆոնդ՝ վերապատրաստման համար եւ դա ներկայացվում է որպես անգլերենի ուսուցման ծախս, սա այնքան էլ բարեխիղճ չէ, որովհետեւ վերապատրաստման միջոցները պետք է ծառայեն աշխատակիցների աշխատանքային որակական հատկանիշների բարձրացմանը։ Դա ներառում է 22 ոլորտի նեղ մասնագիտական կարողությունների զարգացում։
Պարգեւավճարների ֆոնդը
Պարգեւավճարներն ավելացնում են աշխատողների մոտիվացիան:
Երբ հասկանանք, որ այս գործիքն աշխատեց, հանգեցրեց մեր ցանկալի արդյունքին, գործիքը կվերանայվի։
Վերելակները
Նվազեցվել են վերելակային ֆոնդի պահպանման եւ շահագործման ծախսերը, որոնք ուռճացված էին առնվազն 3 անգամ։
Վերելակների ֆոնդը չի կրճատվել վերելակների պահպանման եւ շահագործման նյութերի հաշվին: Կրճատվել է, որովհետեւ կարծում ենք, որ նույն աշխատանքի ծավալը կարելի է ապահովել ավելի քիչ միջոցներով։
Մետրոն
Մետրոյի բյուջեն չի կրճատվել։ Մետրոյի եւ մետրոպոլիտենի վերազինման ծրագրի համար նախատեսված միջոցների մի մասը չի օգտագործվել, որովհետեւ մասնագետները գնահատել են, որ դրա կարիքն այլեւս չկա։
2019 թ. բյուջեով տրանսպորտի ոլորտին հատկացվող բյուջեն նվազել է 900 միլիոնով, որովհետեւ ավարտվել է Մետրոյի վերազինման ծրագիրը:
Քաղաքային տրանսպորտը
Նոր երթուղային ցանցի նախագծման աշխատանքներն ավարտական փուլում են, սակայն ծրագիրը դեռ չի ավարտվել, քանի որ որոշ դրույթներ մեզ համար անընդունելի են։
[[linked-news31246]]
Վերջին հանդիպումը տեղի է ունեցել նախորդ շաբաթ եւ հանդիպման արդյունքներով՝ ծրագրում կա բարելավումների անհրաժեշտություն:
Եթե մեր պահանջները բավարարվեն, ապա կհայտարարվի օպերատորների միջազգային մրցույթ, որը կարող է տեւել ավելի քան 6 ամիս։