Քարոզարշավի ամենահիշարժան դրվագները. 12 օրվա ամփոփում
Երեւան: Մեդիամաքս: Մեդիամաքս մեդիա-ընկերությունն իր MaxMonitor համակարգի միջոցով նոյեմբերի 26-ից դեկտեմբերի 7-ը հետեւել է ընտրություններին մասնակցող 11 ուժերի լուսաբանման ծավալները օնլայն մեդիայում:
Այսօր՝ լռության օրը, Մեդիամաքսն ամփոփում է բոլոր քաղաքական ուժերի հիշատակումնրի ծավալները եւ քարոզչության 12 օրերի ամենահետաքրքիր դրվագները 136 լրատվական կայքերի դիտարկման արդյունքներով։
[[gallery1]]
Նոյեմբերի 26-ից դեկտեմբերի 7-ն ընկած ժամանակահատվածում ամենաշատ հիշատակումներ ունեցել է Հայաստանի հանրապետական կուսակցությունը՝ 6266 հիշատակում:
Հիշատակումների մեծ մասը գոյացել է ՀՀԿ նախընտրական ցուցակի առաջին տասնյակի ներկայացուցիչների՝ Արմեն Աշոտյանի, Վիգեն Սարգսյանի, Էդուարդ Շարմազանովի եւ Արփինե Հովհաննիսյանի ֆեյսբուքյան գրառումներից եւ լայվերից, երբ նրանք կիսվում էին իրենց մտահոգություններով եւ քննադատում Նիկոլ Փաշինյանի իշխանությանը։
[[gallery2]]
Հիշատակումների մեծ ծավալ է ապահովել նաեւ ՀՀԿ ցուցակի երկրորդ համարը՝ Դավիթ Շահնազարյանը, հիմնականում հեռուստատեսային ելույթների եւ մամուլի ասուլիսների միջոցով։ Նա խիստ քննադատության է արժանացրել իշխանություններին, վերջիններիս մեղադրել է Արցախը հանձնելու մտադրության մեջ։
Երկրորդ տեղում հիշատակումների քանակով «Իմ քայլը» դաշինքն է ՝ 5158 հիշատակում: Հիշատակումների մեծ մասն ապահովել է դաշինքի նախընտրական ցուցակի առաջին համարը՝ Նիկոլ Փաշինյանը, ով անձամբ է գլխավորել դաշինքի քարոզարշավը:
Դաշինքը Նիկոլ Փաշինյանի գլխավորությամբ եղավ հանրապետության բոլոր մարզերի քաղաքային բնակավայրերում, մի շարք գյուղական համայնքներում։
Այս ընթացքում լրատվամիջոցներն ավելի շատ անդրադարձել են Նիկոլ Փաշինյանի ելույթերին, թեպետ երբեմն ամբիոնից խոսել են նաեւ նրա կուսակիցները։ Փաշինյանը իր ելույթների ժամանակ հիմնականում պատասխանում էր ընդդիմախոսների քննադատություններին եւ նրանց «սթափվելու» կոչեր էր անում։
Երրորդ հորիզոնականում «Բարգավաճ Հայաստան» կուսակցությունն է՝ 1970 հիշատակում: ԲՀԿ-ն Գագիկ Ծառուկյանի գլխավորությամբ քարոզարշավի ընթացքում եղավ հանրապետության մի քանի մարզերում։ Լրատվամիջոցները հիմնականում մեջբերում էին Գագիկ Ծառուկյանի ելույթները, որոնց ժամանակ նա խոսում էր վարկային բեռից, արտագաղթից, ՀՀ քաղաքացիների կրած դժվարություններից եւ խոստանում էր ընտրվելու դեպքում ավելացնել ներդրումները, տարբեր նախագծեր կյանքի կոչել։ Նա հիմնականում ձեռնպահ էր մնում իշխանություններին բացահայտ քննադատության ենթարկելուց։
[[gallery3]]
Ամենաքիչը օնլայն մեդիայում այս օրերին հիշատակվել է «Քաղաքացու որոշում» (ՔՈ) կուսակցությունը՝ 239 հիշատակում:
Քարոզարշավի ամենահետաքրքիր դրվագները
• Նոյեմբերի 26-ին Սասուն Միքայելյանը քարոզարշավի շրջանակներում հայտարարեց, որ «Հայաստանում տեղի ունեցած հեղափոխության հաղթանակն ավելի կարևոր էր, քանի Արցախյան ազատամարտը»: Այս արտահայտությանը արձագանքեցին հանրապետական կուսակցության մի շարք պատգամավորներ, հասարակական եւ ռազմական գործիչներ: Ավելի ուշ Սասուն Միքայելյանը հայտարարեց, որ իր խոսքը սխալ են մեկնաբանում՝ նշելով, որ «այս հաղթանակը քիչ պակաս հաղթանակ չէր, քան Արցախյան ազատամարտի հաղթանակը, եթե չլիներ այս հաղթանակը, ապա Արցախյան ազատամարտն էլ հաջողություն չէր ունենա»։
[[gallery4]]
• Նոյեմբերի 27-ին մամուլի ասուլիս հրավիրեց Դավիթ Շահնազարյանը եւ հայտարարեց, որ «այսօրվա իշխանությունն Արցախի համար շատ ավելի մեծ վտանգ է, քան՝ Ադրբեջանը»: Շահնազարյանը նշեց, որ Սասուն Միքայելյանի թույլ տված արտահայտությունը «Իմ քայլը» դաշինքի քաղաքական ծրագիրն է»: Նիկոլ Փաշինյանն էլ ուղիղ եթերի միջոցով հայտարարեց, որ «ՀՀԿ-ականների թալանչի բրիգադը պետք է ուղարկվի պատմության աղբանոց» եւ հորդորեց ընտրողներին ՀՀԿ-ին ոչ մի ձայն չտալ: Նա նաեւ սպառնաց, որ «բոլորին կպառկըցնի ասֆալտներին, ու տարիներով վեր չեն կենա էդ ասֆալտների վրայից»:
• Նոյեմբերի 28-ին էդուարդ Շարմազանովը ֆեյսբուքյան ուղերձով անդրադարձավ Նիկոլ Փաշինյանի՝ նախորդ օրը հնչեցրած սպառնալիքներին, ասելով՝ «ի՞նչ ա նշանակում՝ ասֆալտին փռել, վզից բռնել, Դուք վարչապե՞տ եք, թե՞ ասֆալտչիկ, ինչպե՞ս կարելի է իջնել էդ մակարդակին. սա քաղաքական բանավե՞ճ ա, թե՞ քուչի բազառ»:
• Նոյեմբերի 29-ին Ճամբարակում նախընտրական հանդիպման ժամանակ ՀՀ վարչապետի պաշտոնակատար Նիկոլ Փաշինյանն իր ելույթում դիմեց Լեռնային Ղարաբաղի Հանրապետության իշխանության ներկայացուցիչներին եւ նրանց խորհուրդ տվեց՝ «սթափվել»: «Բացարձակապես չեմ հասկանում էդ ինչի՞ են ակտիվացել ու ինչի՞ են տարբեր մեկնաբանություններ անում և ինչի՞ են փորձում որևէ ձևով խառնվել ու իրենց ներկայությունը ցույց տալ Հայաստանի խորհրդարանական ընտրությունների քարոզարշավի ընթացքում»,- ասաց Նիկոլ Փաշինյանը:
• Դեկտեմբերի 1-ին եւ 2-ին Արմեն Աշոտյանն անդրադարձավ Մայր Աթոռի ցանկապատին փակցված «Իմ քայլը» դաշինքի պաստառներին, իսկ Մենուա Հարությունյանը՝ Դավիթ Բեկի արձանի կողքին ձիով նկար հրապարակեց։
• Դեկտեմբերի 3-ին ՀՀ գլխավոր դատախազությունը հայտարարություն տարածեց, որ Ազգային ժողովի ՀՀԿ-ական պատգամավոր Արամ Հարությունյանի նկատմամբ քրեական հետապնդում հարուցելու եւ նրան ազատությունից զրկելուն համաձայնություն տալու միջնորդություն է ներկայացվել խորհրդարան, առանձնապես խոշոր չափերով կաշառք ստանալու դեպքի առթիվ:
• Դեկտեմբերի 4-ին Ապարանում «Իմ քայլի» քարոզարշավի ժամանակ Նիկոլ Փաշինյանն ասաց, որ «85 հազար մարդու նպաստ ու թոշակ եկող տարվա հունվարի 1-ից ավելանալու է»:
• Դեկտեմբերի 5-ին Նիկոլ Փաշինյանը նախընտրական քարոզչություն իրականացրեց Երեւանում: Նա եղավ 54 համարի երթուղային ավտոբուսում, Երեւանի մետրոպոլիտենում, ինչպես նաեւ դռնեդուռ քարոզչություն իրականացրեց՝ ողջ ընթացքում ընտրողներին նախընտրական բուկլետներ բաժանելով:
• Դեկտեմբերի 6-ին լրատվամիջոցներն անդրադարձան նախորդ օրը Հանրային ուղիղ եթերում կայացած աննախադեպ բանավեճին՝ բոլոր 11 ուժերի առաջին դեմքերի մասնակցությամբ։ Լրատվամիջոցները հատկապես մեջբերում էին Գագիկ Ծառուկյանի՝ Էդմոն Մարուքյանին ուղղված «ես քու կլասիկ ցավը տանեմ» արտահայտությունը։
• Դեկտեմբերի 7-ին Գյումրիում Փաշինյանը հայտարարեց, որ «ամեն ինչ լավ է լինելու»։
Մեդիամաքս մեդիա-ընկերությունն իր MaxMonitor համակարգով Հայաստանի մեդիայի մոնիտորինգի, վերլուծության եւ գնահատման շուկայի բացարձակ առաջատարն է: Համակարգի բաժանորդներն են մի քանի տասնյակ մասնավոր ընկերություններ եւ պետական մարմիններ՝ բանկեր, հեռահաղորդակցության օպերատորներ, նախարարություններ եւ գերատեսչություններ, միջազգային կազմակերպություններ եւ դեսպանություններ: