ԿԳՆ-ում քննարկվել է Կայուն զարգացման նպատակների ազգայնացումը
Երեւան: Մեդիամաքս: Այսօր ՀՀ կրթության եւ գիտության նախարարությունում քննարկվել է ՄԱԿ-ի «Կայուն զարգացման 2030 օրակարգում» ներառված 17 նպատակներից չորրորդը, որը վերաբերում է ներառական եւ բոլորի համար որակյալ կրթության ապահովմանը եւ ամբողջ կյանքի ընթացքում ուսման հնարավորության խթանմանը:
ԿԳ նախարարի տեղակալ Դավիթ Սահակյանը ՄԱԶԾ պատվիրակության հետ հանդիպմանը նշել է, որ ներկայում մշակվող Կրթության զարգացման պետական ծրագիրն ուղղված է վերոնշյալ քաղաքականության իրականացմանը:
Փոխնախարարի խոսքով՝ ՀՀ կրթության բյուջեն սահմանափակ է, եւ ուսհաստատությունների զարգացման նպատակով ԿԳՆ-ն ակտիվ համագործակցում է տեղական եւ միջազգային կազմակերպությունների հետ, օգտագործում Սփյուռքի ներուժը, ներգրավում արդեն կայացած կրթական համակարգերը:
«Մեզ համար շատ կարեւոր է յուրաքանչյուր համայնքում ունենալ դպրոց, այլ խնդիր է` հանրակրթության որ աստիճանի: Գործող ֆինանսավորման բանաձեւի պարագայում` այսօր շատ գյուղական դպրոցներ հայտնվել են ծանր ֆինանսական վիճակում: Ներկայում քննարկում ենք ֆինանսավորման նոր մեխանիզմներ ներդնելու հարցը, որտեղ նախատեսվում է պետականորեն ֆիքսել ուսուցչի նվազագույն աշխատավարձը եւ ներդնել այնպիսի համակարգ, որը հիմնված լինի դպրոցի իրական կարիքի վրա»,- նշել է Դավիթ Սահակյանը:
ՄԱԿ-ի մանկական հիմնադրամի հայաստանյան ներկայացուցիչ Տանյա Ռադոչայն էլ նշել է, որ Հայաստանի կրթական համակարգը մի շարք ուղղություններով գրանցել է մեծ հաջողություն:
«Հայաստանը տարածաշրջանում առաջատար է համընդհանուր ներառականության ներդրման առումով: Այն նաեւ հաջողություն է գրանցել նախադպրոցական կրթության հասանելիության ապահովման ու մասնագիտական կրթության եւ ուսուցման (ՄԿՈՒ) ոլորտում բարեփոխումների իրականացման ուղղությամբ»,- նշել է Տանյա Ռադոչայը: