Сүлгі мен майлық таңдау

1-кеңес. Сүлгіні сатып аларда оның қандай матадан жасалған түріне мән берген абзал. Дұрысы 100 пайыз мақтадан жасалған сүлгіні алар болсаңыз, зияны тимейді. Нақтырақ айтқанда мұндай бұйым теріге заласын тигізбейді, сондай-ақ ылғалды тез сіңіреді. 

2-кеңес. Сүлгідегі жіп талшықтасы тығыз орналасқаны дұрыс. Сондай-ақ, салмағы неғұрлым жеңілін таңдаңыз. Біріншіден, салмағы ауыр сүлгі қолдануға ыңғайсыздық тудырса, екіншіден, ылғалды дұрыс сіңірмейді.

3-кеңес. Бұйымның тігісіне мән беріңіз. Оң және теріс жағы мұқияттылықпен тігілген сүлгіні ұзақ уақыт қолдануға болады. Егер тігіс екі қайтара тігілген болса, тіптен жақсы. Бұл сапаның жоғарылығын аңғартады.

4-кеңес. «Жылтырағанның бәрі алтын емес». Иә, ия, бір қарағанда көздің жауын алатындай өрнектелгендері толықтай сапалы деген сөз емес. Дұрысы, сатушыдан бұйымды қорапшасынан шығарып беруін өтініп, өзіндік зерттеуге кірісіңіз. Салмағы жеңіл сүлгі кәдеңізге жарары сөзсіз. Сонымен қатар матасы теріңізге жұмсақ тиіп әрі көлемді болып тұрса, ойланбастан сатып алуыңызға болады.

5-кеңес. Егер сүлгі матасы қолмен жасалған жасыл алаң (газон) секілді қаттырақ болса, бұл бұйым бір реттік екенін есіңізде сақтаңыз. Өйткені мұндай маталы сүлгі бір жуылған соң қажетіңізге жарамай қалуы ықтимал.

6-кеңес. Көлеміне қарай таңдау жасарда қателеспеңіз. Мәселен, сіз жуынатын бөлмеге арналған сүлгі таңдамақ болсаңыз, онда пайдаланушының дене бітімін көз алдыңызға бір елестетіп алыңыз. Шамамен өлшем жүргізген соң барып сатып алғаныңыз дұрыс.

7-кеңес. Сүлгіні балаңызға арнап алмақ болсаңыз, онда оның матасына аса мән берген жөн. Сонымен қатар, табиғи жолмен жасалған бұйым таңдаңыз. Өйткені, бала терісі ересектердікіне қарағанда өте сезімтал келеді.

8-кеңес. Сатып аларда бағасына да мән беру керек. Әрине, кез-келген затты сатып аларда алдымен қалтамыздағы қаржымен санасамыз. Бірақ, есіңізде болсын, неғұрлым қымбат тұратын сүлгінің сапасы соғұрлым жақсы әрі ұзақ уақыт қолдануға жарайды. Сондықтанда бұл бұйымды аларда ақшаңызды үнемдеп қалмаңыз.

9-кеңес. Соңғы кеңесіміз сүлгінің дизайнына қатысты. Мейлі сіз ас үй не жуынатын бөлмеге арналған сүлгіні сатып алатын болсаңыз да, бөлме ішіндегі жиһаздардың түсіне мән беріңіз. Әрине, «үйде күнделікті қолданатын қажеттіліктің түр-түсі маңызды емес» деген тоқтамға келуіңіз мүмкін. Дегенмен бөлме түсімен үйлесім тапса, талғампаздығыңыздың жоғары екенін аңғартатынын ұмытпаңыз. Әсіресе, үйге қонақ келгенде қызыға қарайтындар табылатынына сеніңіз.

Бұл бұйымды әлдекімге сыйлайтын болсаңыз да, оның түр-түсіне мән беру керек. Егер таңдауыңыз сыйлық алушының көңілінен шығатын болса, керегіне жарарына сене беріңіз.

Ас үйге арналған майлық. Үй шаруасындағы жандар үшін ас үйге арналған сүлгінің қызметі орасан. Сонымен қатар олар осы бөлмедегі интерьеріңіздің сәнін кіргізетін де бұйымның түрі бола алады. Мұндай майлықпен ас үйдегі шаруа барысында қол немесе ыдыс-аяқ сүртуге болады.

Бет-қол сүртетін сүлгі. Көлемі орташа, жұмсақ, әрі суды тез сіңіретін матадан тігілген сүлгі түрі. Оның түрлі-түсті түрлері көп. Өзіңізге ұнағанын сатып алыңыз да пайдаланыңыз.

Жуынатын бөлменің сүлгісі. Душта, ваннада жуынып болған соң қолданылатын сүлгінің бір түрі.

Ескерту: Жаңадан сатып алынған сүлгіні қолданбас бұрын міндетті түрде бір жуып алған дұрыс. Себебі артық бояу мен өзге де химикаттар жаңа бұйымда сақталып қалуы мүмкін. Сонымен қатар, бір рет жуылған сүлгі жұмсарып, пайдалануға дайын болады. Егер сіз бұйымды жуарда кір жууға арналған сұйықтық қолданар болсаңыз, мына жайтты есіңізде сақтаңыз: ас үйге арналған сүлгіні мұндай сұйықтықтармен жууға болмайды.

Сүлгіге қатысты қызықты деректер. Халықаралық айтулы күндер күнтізбесінде ерлер мен әйелдер мерекесі секілді «Сүлгілер күні» деген де дата белгіленген. Халықаралық сүлгілер күні 2001 жылдан бері аталып өтіледі. Бұл мерекенің тарихы да өзіндік қызыққа толы. Аты әлемге белгілі ағылшын жазушысы Дуглас Адамс «Автостопом по галактике» атты романында космикалық туристке арналған қажеттіліктердің ішінде сүлгі ең негізгілердің бірі деп жазған. Автордың пайымдауынша, сүлгі тек қана жуынып болғаннан кейінгі гигиеналық қажеттілік емес, сонымен қатар оны жамылғы ретінде қолдануға болады. Әрине, жазушы бұл ретте көлемді сүлгілерді меңзегені белгілі.

Жазушы өмірден озған соң оның оқырмандары 25 мамырда «Халықаралық сүлгілер күні» деген датаны бекітуге ұсыныс жасаған. Ұлыбритания елінде бастау алған бұл күн кейінірек әлемнің өзге елдерінде де аталып өтіле бастады. Тіпті Ресейде де. Бұл күнде моншаға немесе жағажайға бару мідетті емес. Бар болғаны, мойныңа сүлгі асылып жүру үрдіске айналған. Айтпақшы, климаты жылы аймақтағылар 25 мамыр күні сүйікті жазушысы Адамстың құрметіне орай жағажайда жаппай шомылу шарасын ұйымдастыруды әдетке айналдырыпты.

Міне, қызық. Әрине, бұл күнді тойлау қазақстандықтар үшін жат болып көрінеді. Өйткені, біздің айырлы даталар күнтізбемізде бұл күн бекітілмеген. Дегенмен, өзге елге қоныс аудармақ немесе демалысқа бармақ болсаңыз, есіңізде сақтай жүріңіз. Бәлкім, қажеттілігі болып қалар.

* * *

«Әр елдің салты басқа», – деген осы. Ал енді күнделікті тұрмыста пайдаланылатын сүлгі, майлыққа қойылатын көптеген талаптар баршамызға ортақ. Соны бұлжытпай сақтау – мықты денсаулық, көтеріңкі көңіл-күй, тазалық кепілі.