У завакзаллі жыхарам прапануюць пракласці водаправод за іх кошт
Дзясятак вуліц з разбітым асфальтам без ходнікаў, болей за паўтары сотні дамоў без вады. Сёлета гэтая праблема пільна закранула людзей завакзалля. Засушлівае лета напомніла пра ваду; у калодзежах яна змялела.
Каб вырашыць свае бытавыя праблемы, людзі звярнуліся да мясцовых уладаў. Быў прызначаны сход грамадзян, які адбыўся на мінулым тыдні каля адзінага ў гэтым раёне магазіна.
Людзі да карэспандэнта «ГС» па дапамогу звярнуліся пасля безвыніковага сходу. Каля дзясятка ўдзельнікаў сходу расказалі, што на тую сустрэчу прыехалі, па іх меркаванні, прадстаўнікі ЖКГ, але не назваліся. Адзін з іх дакладна працуе майстрам жыллёва-камунальнай гаспадаркі. Пратакол сходу не вёўся. Была звычайная перапалка.
У выніку прысутныя пачулі, што ёсць праход водаправода пад каляёй, а далей яны павінны самі аплаціць пракладку трубаў. Быў агучаны кошт:
90 рублёў за 10 метраў трасы.
Некаторыя грамадзяне палічылі, што тое абыдзецца ім болей за 2,5 тысячы рублёў.
Прадстаўнікі ўлады запатрабавалі ад удзельнікаў сходу подпісы. Паабяцалі, што пытанне адсутнасці ў іх раёне вады будзе пададзена ў райвыканкам і ён прыме рашэнне, ці варта даваць дазвол на будаўніцтва водаправода за кошт жыхароў.
Воданапорная вежа ў гэтым раёне была збудаваная на пачатку мінулага стагоддзя. Магчыма, яна і будзе забяспечваць завакзалле вадой. Аднак прафілактычных работ тут не праводзілася як мінімум тры дзясяткі гадоў.
Сообщение У завакзаллі жыхарам прапануюць пракласці водаправод за іх кошт появились сначала на Газета Слонімская.