На Слонімскі райвыканкам падалі ў суд
Справа ў тым, што 2 кастрычніка адбылося пасяджэнне Слонімскага райвыканкама, на якім разглядалася пытанне аб фарміраванні ўчастковых выбарчых камісій па выбарах дэпутата Палаты прадстаўнікоў.
Слонімская арганізацыя грамадскага аб`яднання БНФ «Адраджэнне» ў склад дзесяці ўчастковых камісій вылучыла па адным сваім прадстаўніку. Аднак члены Слонімскага райвыканкама ніводнага прадстаўніка дэмакратычных сіл, якія маглі б прадухіліць фальсіфікацыі, не ўключылі.
Адзінай прычынай не ўключэння ва ўчастковую выбарчую камісію называлася тое, што заяўленыя кандыдатуры нібыта не маюць вопыту працы ў выбарчых камісіях. Хаця прадстаўнікі дэмакратычных сіл маюць вялікі вопыт удзелу ў выбарчых кампаніях у якасці кандыдатаў і назіральнікаў. І ў выбарчым заканадаўстве разбіраюцца лепш за тых, каго пастаянна ўключаюць у склад камісій.
Трэба адзначыць, што ў склад участковай выбарчай камісіі не ўключылі нават Уладзіміра Бруцкага, які двойчы працаваў у камісіях і мае вопыт. І ўвогуле, адсутнасць досведу працы ў выбарчых камісіях не можа з`яўляцца крытэрыем для не ўключэння ў склад выбарчых камісій.
У сваёй скарзе Павел Севасцьян просіць суд Слонімскага раёна прызнаць рашэнне Слонімскага раённага выканаўчага камітэта па фармаванні ўчастковых выбарчых камісіі незаконным і парушаючым правы заяўніка. Заяўляльнік просіць абавязаць Слонімскі раённы выканаўчы камітэт прыняць новае рашэнне аб фармаванні ўчастковых выбарчых камісій з уключэннем у іх склад прадстаўнікоў арганізацыі.
У трохдзённы тэрмін суд павінен вынесці сваё рашэнне.
Сообщение На Слонімскі райвыканкам падалі ў суд появились сначала на Газета Слонімская.