«За працу ў выхадны дзень нам даюць неаплатны адгул. Ці законна гэта?»
— Па загадзе новага дырэктара нам часта даводзіцца працаваць ў выхадныя дні. Раней за працу ў суботу ці нядзелю прапаноўвалі альбо двайную аплату, альбо аплатны адгул. Апошнім часам за такую працу нам прапануюць браць неаплатны адгул. Ці законна гэта? — пытаецца Аляксандр.
— Пытанні кампенсацыі за працу ў выхадныя дні рэгулююцца артыкулам 69 Працоўнага кодэксу. Ім прадугледжана, што за кожную гадзіну працы ў выхадныя дні робіцца даплата звыш заробку, налічанага за ўказаны час: работнікам са здзельнай аплатай працы — не ніжэй здзельных расцэнак, работнікам з пачасовай аплатай працы — не ніжэй гадзінных тарыфных ставак (акладаў).
За працу ў выхадныя дні ўзамен даплаты са згоды работніка можа прадстаўляцца іншы неаплатны дзень адпачынку. Такім чынам, наймальнік не парушае закон, прадстаўляючы неаплатны адгул за працу ў выхадны дзень.
Апрача Працоўнага кодэксу, пытанне кампенсацыі за працу ў выхадныя дні можа рэгулявацца працоўнай або калектыўнай дамовай.
Праца ў выхадны дзень дазваляецца па прапанове наймальніка і толькі са згоды работніка або па ініцыятыве работніка са згоды наймальніка, за выключэннем выпадкаў прадухілення катастрофы, аварыі, няшчасных выпадкаў. Дазваляецца выкарыстанне для працы не больш за 12 выхадных у год кожнага работніка (сюды не ўключаюцца выхадныя дні, калі работнік прыцягваўся да працы па прадухіленні катастроф, аварый, няшчасных выпадкаў), — адказаў на пытанне нашага чытача юрыст Алег Мацкевіч.
Сообщение «За працу ў выхадны дзень нам даюць неаплатны адгул. Ці законна гэта?» появились сначала на Газета Слонімская.