На Мастоўшчыне — новы пляж: на Шчары ў лесе
Вадаёмаў у раёне бязмерна, і тыя, хто захоча папляскацца ў вадзе, за сорак кіламетраў у адзін бок дзеля гэтага не паедуць.
Нечакана напачатку чэрвеня раённая газета паведамляе, што на Мастоўшчыне адкрыўся яшчэ адзін пляж. Ён знаходзіцца на беразе ракі Шчара ля вёскі Каралі. Пляж не раўня мастоўскім — 2000 кв. метраў. Месца купання — 150 метраў. Гэта маляўнічыя мясціны, тут яшчэ з савецкіх часоў праводзіліся і праводзяцца зараз разнастайныя злёты і спаборніцтвы.
У карэспандэнта «ГС» паўстала пытанне: адкуль такая спешнасць у абсталяванні таго пляжу? Праўдападобна, што адна з прычынаў яго, гэта публікацыі ў «ГС» пра мастоўскія зоны адпачынку. Былі ўжо факты, калі ўлады аператыўна рэагавалі на друк. Тое, што папярэдне не было запланавана будаўніцтва гэтага пляжу і выдаткі не закладзены ў раённы бюджэт гаворыць наступнае. Арганізацыі горада і раёна ўсе фінансавыя выдаткі на яго ўзялі на сябе. Вось факты.
Таварыства выратавання на вадзе абследавала акваторыю ды паставіла буі, дзіцячую купальню, інфармацыйныя стэнды, а таксама правяло навучанне мастросаў-выратавальнікаў, якіх забяспечыла паляўнічае таварыства «Белая сцежка».
Санэпідэмстацыя правяла супрацькляшчовую апрацоўкі тэрыторыі. ААТ «Мастаўчанка» забяспечыла пляж плаўсродкамі і выратавальнымі прыладамі. Мясцовае ЖКГ на пляцоўку для збору смецця паставіла кантэйнеры, насыпалі пяску на пляж і валейбольную пляцоўку. Дарожнікі добраўпарадкавалі пад`езды. «Райсельэнэрга» — зусім не па профілю дзейнасці — зрабіла кабіны для распранання, дзіцячую пляцоўку, набыла і паставіла ценявыя навесы. Малькавіцкае лясніцтва ўстанавіла засцерагальныя шлагбаўмы, лаўкі, абсталявала валейбольную пляцоўку. Сельгаспрадпрыемства змайстравала туалет.
31 траўня быў падпісаны пашпарт аб`екта. Новая зона адпачынку запрацавала.
Аднак гэта не ўсё. Далей паўстаюць некалькі пытанняў. Найперш, хто будзе плаціць выдаткі на абслугоўванне пляжу. Прыкладам, у вёсцы Глядавічы пляж знаходзіцца на балансе сельгасгаспадаркі «Чарлёна». Відавочна, што за гэты будзе адказваць банкрут ААТ «Мастаўчанка». У гаспадаркі на сённяшні дзень вельмі складаны фінансавы стан.
Само ж месца адпачынку цудоўнае, толькі даехаць туды — шлях далёкі. З Мастоў да Малькавіч – 20 км ды яшчэ да вёскі Каралі 2 км з гакам.
Фота «Зара над Нёманам»