ՄԱԿ-ում ԱՄՆ դեսպանը քննադատում է Ռուսաստանին
ՄԱԿ-ում Միացյալ Նահանգների մշտական ներկայացուցիչ Նիքի Հեյլին կոշտ քննադատության է ենթարկել Ռուսաստանին, որը պատրաստվում է վետո դնել պաշտոնական Դամասկոսի դեմ քիմիական զենք կիրառելու համար պատժամիջոցների սահմանում նախատեսող բանաձևի վրա:
«Դա ծիծաղելի է: Որքա՞ն է Ռուսաստանը պլանավորում սիրիական ռեժիմին դայակություն անել և պատճառաբանություններ հորինել», - հայտարարել է ամերիկացի դեսպանը:
Ավելի վաղ ՄԱԿ-ում Մեծ Բրիտանիայի մշտական ներկայացուցիչ Փիթեր Ուիլսոնը լրագրողներին հայտնել է, որ ԱՄՆ-ը, Ֆրանսիան և Մեծ Բրիտանիան «շատ սերտորեն աշխատել են» համապատասխան բանաձևի տեքստի վրա և ցանկանում են առաջիկա օրերին քվեարկության դնել:
Ի պատասխան՝ ՄԱԿ-ում Ռուսաստանի մշտական ներկայացուցչի տեղակալ Վլադիմիր Սաֆրոնկովը զգուշացրել է, որ Մոսկվան վետո է դնելու նախագծի վրա: Սաֆրոնկովը կարծիք է հայտնել, մասնավորապես, որ Սիրիայում կառավարական ուժերի կողմից քիմիական զենքի կիրառման հանգամանքների հետաքննությունը անաչառ և անկախ չէ: